Anupam Kher-i tetsü atema Shimla nung ki ka alitsü

Shimla, March 26 (Agencies): Bollywood nung actor tejen Anupam Kher-i tanü Himachal Pradesh nung pa mezüng ki aliogo. Kher shiba Himachal nung soa intet pai iba ki tetsü nem sempet agütsü.
Kher-i ashiba agi, pai Shimla nung ki ka alinüa liasü, kechiyong pa lanuwa idakji dang intet.
Iba tepelatsü osang pai Twitter nung video ajang pa sapurtem den lemsatep. “Asenok India nunger-i pei intetba tesem nung pei ki alitsü asoshi jangrar. Shimla nung ozü mezüng ki aliba tepela nenok den lemsateper. Iba ki ketsü nem sempet agütsür,” ta Kher-i ashi.
Kher-i video nung tetsü tebilemba lemsatepa yamai ashi; “Kübu idaki Forest Department nung clerk ka ama inyaka liasü. Onok taküm piyong sorkar ki aser taa agütsür aliba ki nung dang lia aru, aser tetsükdangtsü kar aliba ajanga ni Shimla nung ki maliteti liasü. tanü ni Shimla-i arua ki tila ka aliogo, aser iba ki ni kütsünem sempet agütsüner. La kanga dang pelar aser yashi nungi tepela nüktzü tsüngranger kazüdar. Kütsüi ashiba agi, iba sempetji la asoshi kanga dang tobur tajung lir. Tanü kübua taküm lir ta dang südaktsünüali.”
Küm 62 tain Kher 1955 küm March ita Shimla nung Kashmiri Pandit kibong ka nung aso. Pa lanuwa D A V School nung azüng. Pai Himachal Pradesh University nung jilushi balala nung shilem agia liasü.