Anurag BCCI Tir tanübotisang akümtsü akok

Mumbai, May 21 (Agencies): Taoba Board of Control for Cricket in India (BCCI) Secretary, Anurag Thakur-i asüng, Deobar nü agitsü ayongba BCCI’er Special General Meeting (SGM) nung BCCI Tir tasenba akümtsü jenjang ngua, BCCI Tir tanübotisang akümtsü terenemshiba agiba osang angazükogo.
International Cricket Council (ICC) nung independent mendenbuba akümtsü nükjidong nung tawa BCCI Tir menden toktsüsang, Shashank Manohar melenzüka BCCI Tir tasenba akümtsü nükjidong nung Anurag-i BCCI Secretary menden nungi anener Tir election nung candidate ka ama tokteptsü asoshi tanü tenüng züluoka liasü.
Tir election nung candidate ama tokteper kati tajemba agi India nung tentetba cricket tentet ka nungi pusemba shiti angutsü nungdaka lir saka Anurag pusemer ta sayutsü nükjidong nung Bengal, Assam, NCC, Tripura aser Jharkhand densema, East Zone nung tentetba Cricket Association 6 pronglai Anurag pusemtsü osang metetdaktsüogo.
Justice R M Lodha Committee-i benokba ama, BCCI-i nungdakba temelenshi agitsü asoshi India Supreme Court-i ajungshiba mapang ka nung BJP yimtenren telok nungi Lok Sabha MP menden abensang, arishi küm 41 tain Anurag-i BCCI Tir menden abentsü aosshi tan renemshir lir.
Ano külen, Anurag melenzüka BCCI Secretary menden abentsü asoshi Maharashtra Cricket Association (MCA) lenisang, Ajay Shirke-i terenemshiba agiba osanga jangjaogo.