Anurag Thakur arishi küm 41 nung BCCI Tir akümer

May 22, 2016 : Anurag Thakur Board of Control for Cricket in India (BCCI) Tir tasenba kümogo. Thakur ya BJP MP ka lir aser BCCI Tir inyaka arur rongnung tanubosang Fateh Singh Gaekwad sülenbo pa tanubo lir.
Fateh Singh Gaekwad ya arishi küm 33 asüdang, 1963 küm BCCI Tir asütsü shima liasü.
Shashank Manohar International Cricket Council nung independent chairman mezüngbuba asütsü atema BCCI Tir menden toktsüba sülen Thakur iba menden atema tokteptsü renem. BCCI-i Tir menden atema tokteptsü osang ya parnok indang official Twitter handle (@BCCI) ajanga metetdaktsü.
Thakur-i iba menden atema toktepdang nüngdangba east zone telen trok indang sign ajak BCCI Tir shimtsü atema agütsüba form nung südaktsür bener aru aser teinyaktsü ajak tesüiba mapang India captain aser Cricket Association of Bengal (CAB) Tir Sourav Ganguly den tembanga inyak.
Maharashtra Cricket Association nung tekolakba aser business mongin Ajay Shirke-i,  Thakur-i toktsüba Tongti Tezülur menden melenzükogo.
BCCI Tatong Tir CK Khanna-i Special General Meeting (SGM) ketdangsüa Tir tasenba tenüng metetdaktsü.
CAB, Assam CA, Tripura CA, NCC aser Jharkhand SCA teloktemi pa indang nomination nung sign sütsü.
BCCI dang Justice RM Lodha-i aniba Committee-i tuyuba ama tang rongdak temelenshi nüngdaka aliba mapang ka nung Thakur Tir menden nung amener.
1998 nungi 99 tashi Tir asüsang Raj Singh Dungarpur sülenbo cricket asayar tajung ka Tir mendeni atuba ya Thakur mezüng lir.
2013 IPL Spot-fixing dak sentakba nung iba mapang Tir alisang, N Srinivasan menden nungi anendaktsüba ajanga pa melena tesüiba mapang cricket asayar Sunil Gavaskar aser Test crickt asayar Shivlal Yadav nati iba menden repa benja liasü.
Thakur-i HP nungi Ranji Trophy asayamong nung batsman ka ama khen asayogo aser iba sülen 2000 nungi 2011 mongpu nung spain bowler ka ama asaya.
Thakur ya East Zone-i pusema BCCI Tir akümer tasembuba lir.
Srinivasan Tir menden nungi anendaktsüba sülen Jagmohan Dalmiya melen ajisüaka pa asüba ajanga 2015 October ita nung Manohar Tir shima liasü.