Ao

– B.Wati, Chumukedima.

AKKOR aser Ao Senden Literature Board-i shitakba sepai tajung ama Ao kaket Ken-o (literature) meima wazüka ayutsü mapa inyaker. Kin kaji saru shitak agütsüba agi masü, oshi (language,dialect) agi sayur. 2018 nungi Govt school-tem nunga Alternative English melen Ao o subject ka ama inoktsü osang ya kanga tang tajung lir; ano menurang apitetba ama angateter.
Ao kaket ken o tera (root) ya American Baptist Missionary-tem lir. Parnoki tentetba Ao o zülu nungi olasü,aser jembiyim api tajungtiba agi yanglushia mezüng lenir tajungtem asür Nokdenlemba, Rev.Dr I.Ben Wati, Chongpongchiten parnoki anir lenir tajungtemi Laishiba Ao oshi nung kanga dang timtema meyipzukba angateter. ( Ao Laishiba Jurila Otsu. I.Ben Wati) Iba Laishiba meyip dang English nüngja aser tetezü Ao nung bushiteta inoktsü (coin words) merangdang nübor teyongyaba menudaktsüba shia lir.
Tsüngrem temeshi O nisung o nung meyipdang nüngja tasen,tetezü tasen-tem aser olasü tasen aika renlokba otsü lir. Tanü aseni melamelaa dang Ao azüngba,jembiba aser züluba ya yashi item tangateter ishikati meranga inyakba metsü (seed) lir.
Asüng iba oshi kechi tiai aitsü ; tangar oshi samaba ama tejembir melie samatsü ama nibo mapang shia asükjanga meronga shisabulur.State nung Aoer nütsüng timba agi lakh asem nungi pezü tashiang alitsü amai bilemer. Item rongnung iba oshir jembir aser iba oshi nung züngteter kwi alitsü. Jembiba dang masü; iba oshi koma,aser koda jembir item ya-a kanga tongtipang aser nükmen lir. “Taoba putu nungbo Ao oshi liasü; saka tanübo mali.” Iba ama tiai-ang atongtsu asu ta-a bilemer. Oshi indang shisadangertemi bushitetba agi oshi ka samatsü mapang talangkabo magir. Kodang kin nüburtem rongnung oshi meimtsu tanüla samadir, iba den külemi parnok oshi samar.
Tanü tensa den medemdang nung iba oshi ya tesamaleni odar ama. English agi masü asen yimya aser mapa agiang asen nüngdak ajak bener arur sur-nung asen loktiliba aser kija taküm nung iba ya-ang tongtipangtiba tongshilong ama amshiteper. Bendanglen alir English terara shiteter rogobo ajak meteter ama amanga yimtsüng loktiliba nung mangmangkomangsa bener aruba otsütem lir. Tanü alima nung takar tashitaiter kintemia kin tila tulu kecha mesükshii kin shia panok yimten aser sobaliba temeten aser kin ka temeten noksaji tetsü taso oshi lir ta tangatetba nung English angazükdaktsütsü masü, parnok shishilemba oset ajak panok mulungba oshi nung meyipa amshidaktsur. Asenokiang aretkoshia amshirdang, parnokbo sen dang ngurbo ojang.
Aika rongnung tatishitsu tila ka, kinungtsu dangi lar medemtsüri 20th March, 2017 anepdang 11:51 nung USA visa angutsü atema sarasadem meshia mobile shiti ka yamai aru. ” Among, please need special prayers, tangar countries ajak salary released süogo,saka Indian nungerbo Government-i Nokdangba agi ano release masü. Ano tangya, visa alirtema special permission card charge asür. Only for Indian staffs, because this organisation has shut down in India in March 15, temelaba angutsü prayer süjangma.” Ya tanü asen Aoer bendanglen alir sobaliba(culture) lir.
Tanü ano kanga dang nanga aser sapua jembiba bazaar oshi Nagamese ya-a Ao südaktsütsü tashidak ka asütsü. Pei yimtsung loktiliba agi laakadok asü pokyim atemaar, joko bendanglen talisa Dimapur aser Kohima nungang timba nungdener. Pi kin den joko iba yaang tongtepratep o tongtipang kümer sorochiokdak tashi nung yaang sapua jembir. Loktiliba aika nung talisa Police kiyong (police community) amala nungbo yaang parnok official language ama tekülem nunga amshir. Zuluzüra ajak English, saka nagamese dang jembir. Pei tetsü oshi nung asungdangra ‘ moi sobto nebuji, olob-solob puja-do- puji, holibi koboli nabari, sorry.’
Alima ajunga yimtsung ka ama kümadoker aliba sobaliba agi shirangdaktsüba, meimchir kin lokti tuluba tashi agiang amokbangba den asensasa asen oshi meimtsu tanela remsepdaktsüba tashidaka lir. Meimchir asoshi kibong den lokti tentet ya kanga dang tongtibang. Koda,koma, kechi jembitsü aser inyaktsü, item nungi ajak angazüker. Yimtsüng nung dang masü jila-tem(towns) nunga loktiliba nung mejangraba tanela lir. Private school-tem nung küm shia fee atuba ama dang kilen aser züngsem saru sarur saka nübor tejangraba aser teyongyababo bener marur; aika atema lokti tentet ya telemtet maka kiboksem aruba agi alakba ama bilemer, küm nung lokti senden ken anaben tashiang liteter saka nübortemi meima aser jangraa marur.
Oshi kümzüka ayutsü atema sorkari tesayur post agütsüba kisüng agidangbo makoktsüba tesashi waratem asen meketa lir. Yimtsüng dak alaka jila shia nung yimer telongjem, fellowship,Arogo aser tsüraburtem atema teinyaktsu wadang tulu lir. Jila shia nung pei yim saseb kilen kwi lir,kilen shia nung tanur-tila dena Ao jembir,zungteter kwi lir, küm shia züngdangba (census) agia saru aruba nungi Newspaper war expenditures nung masü junga jembir aser zuluteter nembo senpet (award) agütsütsüla ta angateter.
Küm aika dang English o jembir aser zülur saka English nunger makümer. Asen oshi agi asen kechiar sayur. Aseni kodang Ao mejembir, idangji Ao aser iba kin samatsü tenzüker.