Ao Arangtet Tatidang nisung 203-i agütsür

Jubilee Memorial School Mokokchung nung Ao Arangtet Tatidang agiba mapang tangokba noksa nung angur. Mokokchung, October 18, 2017.

Mokokchung, Oct 18 (TYO): Ao Senden Literature Board (ASLB)-i ayongzüka Ao oshi nung Arangtet Tatidang Bodbarnep nungi tenzüka centre 3 nung agidagi. Mokokchung nung Jubilee Memorial School, Dimapur nung Missionary Hr. Sec. School aser Kohima nung Chandmari Hr. Sec School nung agir.
Taküm iba tatidang ajak senteper nisung 203-i agütsüdar. Mokokchung nung 139 (tetsür 111 aser tebur 28), Dimapur centre nung 45 (tetsür 38 aser tebur 7), Kohima nung 19 (tetsür 13 aser tebur 6) ta lir.
Arangtet Tatidang telemsaji; under graduate atema AT-I nungi AT-V tashi lir, graduate pur atema AT-I nungi AT-III tashi aser Post Graduate pur AT-601 aser 701, ta lir. Tanü item class balala nungji paper ka agiogo aser Oct 19 & 20 nüji paper kaka agitsü anünga lir.
Kümshi Arangtet Tatidang agütsürtem teimba-teimba renloker. Küm shia iba ama renlokba tetezüji Ao oshi angazüknür lanur tejangrar aika adokba temaitsü sayur, ta ASLB züngsem kati iba osangbener den jembidang ashi.
ASLB-i school aser college balala nung azüngtsü atema kaket (text book) balala menünga adoker, Ao kaketkeno aser oshioben rendaktsüba wadang inyakba den ano tongtibangsa Aor ajaki zülumen/ozülu (spelling) lirumedema zülutettsü nükla yur ‘Arangtet Tatidang’ ya agia arur.