Ao Arangtet Tatidang tenzükogo; tatidang agütsür 171 lir

Mokokchung, Oct 21 (TYO): Ao Senden Literature Board (ASLB)-i achayanga agiba Ao Artangtet Tatidang ‘Ao Proficiency Test’ Bodbarnü nungi tenzükogo. Iba tatidang ya centre asem Mokokchung, Kohima aser Dimapur ta küma lemsar school balala nung agidaki.
Taküm AT 1-5 aser M.A I & II tatidang agütsür ajak 171 lir. Mokokchung centre nung 124, Kohima nung 11 aser Dimapur nung 36 lir. AT-I P.U level nung 20 aser graduate level nung nung 45, AT-2 P.U level nung parnok 5 aser graduate level nung 52, AT-3 nung ana (2), AT-4 nung par 18 aser AT-5 nung 11 lir. Iba den ano M.A-I nung par 9 aser M.A -II nunga parnok 9 lir.
ALSB-i Ao kaketkeno aser oshioben renlokba wadang nung meranga inyakdaki, aji oda, kümshi Arangtet Tatidang agiba ajanga Ao zülumen liro medemba den lanurtem lenla balala nung tajangzük ngudaki. Yaküm tashi centre ana dang liasü saka tejangrartem aliba reprangteta taküm nungi ano Kohima nunga centre tenteta agir.
Tanü yangi Mokokchung centre jubilee memorial school nung sannüker Temsüwatii sarasademer tatidang tenzük. Artangtet Tatidang shiaji takoker nem certificate, diploma aser degree balala agütsür. ASLB nungi certificate alirtem dang school mesüra institution balala nung Ao tesayur mapaji inyaktettsü asoshi Ao Sendeni tetuyuba ka agüja lir.
ASLB-i tang tashi nung class A nungi higher secondary school aser University B.A degree level tashi atema text book zülua/menünga züngdaktsüdaki aser M.A proficiency test atemaa ASLB-isa kaket menünga adoka lir.