Ao Arogotem asoshi mazüngba mongpo (Busiest season)

~ P. Wati Jamir, Retd. HM, Tuli – 17.

Tir Yimyim (adok 32) Nov. 10, 2018 tapak 5 nung adianu S. Pangeri ABAM tanishirtem dangi züluba nung ola mekümdaktsüi osemloksa Aor Arogotem dangi, tongtibangsa ABAM Ex. Secretary aser Aoli telongtet nung aliba yimtsüng Arogotem dangi kü tangatetba aser takinüba kar zülur. Kar asoshi tajung, kar asoshi majung asütsü, saka ibai kü jurila tangatetba dang ta bilema züngdaktsüner.
1. November, 2018 tashi nung ABAM Central Council temogo. Küm piyong ABAM maparen nung mokozü alongba angashia tebilemtsü kar liasü amasa angashi, saka junga tempangba angashia pelar. Saka ABAM Ex. Secretary-i anir lennirtem dang olen ka shiner.
Alima ainba den Arogotem ainer. Yamaji aodang toluba akümer joko “alemlibo” ta jembiti, onok dang Aoli telongtet nung tsükong 5 dang kaketshidak tesayuri sayu. 1. Ongpangkong 2. Langpangkong 3. Asetkong/Tzüsümakong 4. Changkikong (tangbo Jangpetkong ta ajar) 5. Japukong.
Tangpo tsükong 6 kümogo. Item tsükong yimtsüngtem nung Arogo tenzükba tarensen (sequentially) ABAM ket nung alitsüla.
Taküm ABAM Central Council nung joko Aoli dang masü Nagalima arogo tenzüker küm 150 ajungba (sesquicentennial) amongtsü asoshi 2019 nungi renemtsü asoshi lemtetba ABAM ajanga sangdongba nguogo.
Sürapang ko g, kodang? Aser kong tenzükba? Itemji tanü-asüng yimsen küma ABAM nung züngsem akümba arogotemi junga mejangjai alitsü akok.
Anungji iba benjungmong madongdang Aoli yimtsüngtem nung Arogo tenzükba tarensen ajak ta mesüaka küm 25-50 tashi nung tenzüka yimtsüng Arogotem tenüng tejangja agütsütsü merangdaktsüner.
2. ABAM ta ajaba ya Central Council ta melener arur. Ao Arogotem kümdanga melira kobi melii Pastoral council mesüra Ordained Ministerial Council ta küma aotsü.
Joko Laishir jenti adoker. Arogotem nung Pastor-temji kar dak alaka ayangertem dang. Tanela khuret abenba tenzüker aki anünga kümogo.
ABAM nung lennirtemji teimba Reverend-tem aser Arogo nung Pastortem shimteta inyaker asünung yimya aki pei ajunglen bilema temzüng ozüng yanglur.
Tatishitsü ka – Joko küm ka-ana arur, Arogo ka nung Pastor ita sen meyi kabosa agütsütsüla. Yim tila Arogo kari magütsütetra ABAM-i enoksemtsütsü ta lemtet.
Ibai junger, saka yimtsüng tila Arogo kar asoshibo maksü, ibajidang masü kangtepa sarua agütsütsüsa akümer, saka ABAM-i enoksemba senji kong nungi?
ABAM budget saruba anener Arogo shia income nungi 5% meshir, Arogotemi agütsür. ABAM Office nungibo ita shia aruba (arogotem nungi) report Arogotem dangi yok ta angazüker, saka nütsüng nüburtemi memeteter. Iba ama Arogotemi mapang shia xerograp copy amshitsüla. Ibaibo Arogotem mapa.
3. Ordination – ABAM kübok ordination Council ka lir. Anungji tapi aki kati recommend asüba ajangadangbo tenzüker ka nem ordination magütsütsüla.
Pastor kati Deacon Board mesüzüker Arogo mongdang nung benoka lemtetbaji teperi masü. Ibai canvassing (mesüzüktepba) mapa. Anungji Pastor ka ordain asütsü asoshi ordination council tsüngtong oa arogo nung ken/anabenbo tsübangobangpur kar den ajurutepa memetettepi tapi agi deacon Board kuli ajangadangbo ordination magütsütsüla.
4. Ordained Minister/ Pastor nem penshon agütsütsü lemtet. Ya ABAM-i local Arogo dictate masü tajungba, kechiaser iba asoshi ABAM-i pension totoktet ka agütsütsü makok. Saka kokrapang ordained Pastor ka kodang kümsük aki tonga anentir, local arogotemi teyari karbosa agütsütsü ajungshiba dang agütsütsü akok. Ibai local Arogo molong.
Ordained Minister/ Pastor kaji academic qualificationji class 10 passed asübapo asü tajungba.
Tatishitsü ka, Nisung ka class V zünger tangar kin arogo nung lia ordained asü. Pa iba titleji bener ABAM züngsem Arogo nung Pastor inyak. Pa asüdang pa mangji tenlakidang bener tua asüpila sendong akia arem.
Tangar kin mongdangi ordained sütsübaji ABAM-i recognized asür asü masü mesüra condition kar lir?
Tanü asüng Pastor-tem kari Arogo guidelines nüngdak maka, laishiba ya dang ta arogo bangdak melitetba tenzükertem lir. Arogo rongsen ajak pa juri meyong ama amshir, itemji Arogo inyakyim lenniba nung manidaktetertem. Item nisungji Arogoi sodi agütsütsüla, kechiyong Pastor kaji Arogo wadang nung toklang tenzükertem asoshi lennir ka dang Arogo nung pa kibur masü ta angatettsüla.
5. Superannuation/Pension –
ABAM-i yangluba service rule nung küm kwi nung mapa nung anentsü renema ali iba nungji Arogotem ajak yimmedema aotsü merangtsüla.
Saka Arogo kar nungbo pension tonger, ABAM-i arogotem asoshi bilemja ordained Pastor kaji ordained süaka ordain süli Arogo medoktsüi küm pungupusa tenzüktsüla ta lemtetba ama, pension ngur ordained sür küm pungu tashi tenzükaka anosa inyaknüa züngsemtem mesüzüktepa tashiyim aki ayong ayonga arogopur anisabasa angashir.
Ibaji shidak süra, ordained ministerbaia nütsüngtemi pa aki laktetogo ta angateta mapangtong shidak nung sodi akitsüla.
6. Arogo küm tatem mongdang –
ABAM lemtet ajanga Arogo küm tatem mongdang nung Arogo Pastor mendenbuba asütsü ta lemtetba ya meshidak.
ABAM Central Council nung ABAM Executive Secretary menden masü outsider shima anidakja aruba tashi dang metet. Iba sülen komasa melenshia aru? mejangja.
Saka Arogo küm tatem Mongdang nung Arogo dak sentakba tajung-tamajung ajak jembir aser jembitsü. Nüngdakra Pastor mesüra tesayula ama indanga jembitsü anungji Pastorba mendenbuba sür mena lia pai anir pa indang jembitsü mazü.
Ibaji dang masü mapang matongdang agenda bendenba nung pai makinüba onük paidoka yutsüba yimya angur.
Yamaji Arogo küm tatem mongdang nung Arogo nung Pastorba menden mesüi tangar ka menden shima mongdang tajungba.
7. Kechiba mazüngtiba mongpo ta ashir, Arogo ya aki mapang arogo to masü kümogo.
Joko arogo küm tatem atongerji Deacon kar sodi, temelen kar shimtsüla, itemji Pastorba den apetba karbo sodi magütsüner, ano tasen shimtsüburtemjia Pastor aser Deacon tejenbur den apetertem shimtsüla. Yamaji ano kari Pastorba nem sodi agütsüner, kari magütsüner, karbo Deacon term 4 mesüra 5 tashia inyakner, kar tasen yiner.
Departement ajak nung yamaji pei-pei molungpur bushitepdang küm tatem mongdang matem tashi aonunga junga amoa mao canvassing (nisung mesüzüktepa ita asüba agi mazüngtiba mongpo ta jatsür.
8. ABAM Calendar nunga special Sunday ta lira, iba den local arogotem nunga special Sunday (Department shia) enokba ya ajemtsüla.
9. Tatemsa – Deobar sentep nung Deacontemi juli amer sen sarua (meshia) saruba yimya ya Arogotemi endoker tajungtiba yimya melenshia ao junger. Ibai tejen putu yimya. Nisung ajak ka amadang mali, anungji ibai ajanga maksüa ajangzüker.
Saka mapang ka nung Rev. Alemmeren-i kü dang yamai ashi “Mr. Wati, ni sensaker kibong nungi adokji aiben sentepi aodang tenla sen bener motet, anungji kodang sentep kidang sen sarua arudir, ni Tsüngrem dang “Kü molungjang na agiang ta sarasadem,” ta ashi.
Amanger asü mamanger ?