Ao Baptist Pastor’s Fellowship (ABPF)-i aitsür

Dimapur, Luroi (August) 27 (TYO): Naga arogotemi Vajpayee indang aut enokba inyakyim anema noktakba nung Ao Baptist Pastor’s Fellowship (ABPF) adener.
Yimtenren sabang tenüng amer lokti aser tamangba den meputepba inyaksangshi balala inyakba anema arogoi noktaka arur. Arogoi Khristan tamangba yimsü menenmechir aser tenüng menüktsür anema teti noktaker, ta ABPF Tir N. Lipok Jamir aser Tatong Tir Dr. Akok nati ashi.
Naga nunger ya Khristan tamangertem lir aser asenoki Laishiba tesayuba sülen anidaktsüla. “Temalen anüng, mesüra telunglen ali, mesüra ali teküboklen tzü nung aliba mesükba kecha atema süngyanglu teyanglu : nai parnok madang tapudak mesüra parnok tekülem… Anitet 20:4-5” nung shia aliba asenoki teti bilemtettsüla, ta tenati ashi.
February 16, 2018 nü ABAM-i general election nung tokteptsü aliba candidate tem sarasademtsü jaokdang Imna Along Longkumer-i asen Khristan tamangba lendong nungi kümzüka ayutsü aser nübo agi tangar memenepba Khristantem kümzüktsü atema BJP ticket nung tokteptsü jangrar ta ashi. Ajisüaka, Khristan ka ya kuli asüba lennir kati tamangba yimsü anema mapa inyakba nung shilem agiba angudang temulung raksar, ta ABPF-isa metetdaktsü.
Nütsüng yongsük 90% tashi Khristantem aliba tesem nung asen lennir kati iba mapa inyakba ya tamangertem atema tetsükdaktsü ka lir. Anungji, Minister Imna Along Longkumer-i inyakba mapa aser pa tangatetba khukhua aitsür, ta parnokisa ashi.