Ao Calendar, 2018 agientsü otsüng nenshir

 ~ Tsüknung Penzü, Dimapur.

Ao Senden Literature Board (ASLB)-i purapujia yangluba Ao Calendar, 2018, agienang, withdraw süang ta ni Tir Yimyim nung anogo ishika tejaklen adoktsüogo. Iba onük nung nübur kü ocet azünger aikai kü dang parnok bangkila (opinion), appreciation & criticism ashiba kar bendena Aor ajak lesson angutsü yangi teküboklen agütsür.
Medemsortemi kü dang ashiba:- “Ao calendar tangsa tang agienang ta nai ashibaji shitak dang. Saka nai züluba o (your presentation) tesashi aser tesepra. Aser ano ‘court-i aotsü’ ta asübaji meshitak. Aji agi Ao Senden-a temulung yiru asütsü akok. Aser ajiagi na parnok kilemi jaoka shity yok asütsü akok. Anungji yasürbo o tanük agi züluang”
Ni iba medemsortem o tajungji pelashishia agizüker. Kü onük nung nenok temulung yirua lira kü dang tai tokang ta ni yashi (12.08.2018) jisa Ao Senden dangi shity ka zülua yokogo. Kechiyong tetoktepba agi masü saka tangatettep agi dang ni-a literature mapaji inyakner.
Aji süaka ni koba Ao Senden dangi yashi shity ka yokogo, aji kü calendar ocet atema tai tokang ta züluba masü, kü ocet olen tesashi aser tetsürok züluba nung nenok mulung yirua lira tai tokang ta ashirba ako! Anungji, tetoktepba agi masü, saka Aor ajak tangatettep agi Ao calendar tai (faulty calendar) ya ASLB-i agientsüla ta kü o nenshir.
“Ao calendar atema Aor rongnung civil war, rara tulu adoka lir” ta ataloka ora aji tangar kin matsüngdang Aor osang aser remark majung.
Party anatsülen nungi teinyaktsü mapa anana yamai.
a) Ni ocet zülusang Penzüba tsütsülen nungia O tesashi aser tetsürok agi ocet zülubaji anendi. Taoba nung züluba atemaji ni Ao Senden dang aser kü ocet azünger ajak dang tatok meshir. (Saka aji calendar tai agienang ta ashiba nungjibo ni masetshi-i nokdaka lir).
b) Kü ocet nungi ita 12 tenüng aser hapta nung anogo 7 tenüng agütsüba nung, rough copy nungbo zülur nung fair copy ajendang majensemba (missing sentence) ka yamai yangi süngtsür:- Ita 12 tenüng aser anogo 7 tenüngji Ao yim aika nung balala jembiba lir asü nungji, ano ni agütsüba kü suggestion ta dang züngshiangma. Ao yim ajak nung jembiba medemdanga Aor telongjem agi calendar ji yanglutsüla. Ni agütsüba ita anogo tenüngjisa agiang ta ni mashir.
Ao Senden tsütsülen nungi teinyaktsü mapa ana yamai lir:-
a) “Nenoki kü tenüng angatika nung tetetshi” ta kibuba Tsüngremi nisungtem dang laishiba Baibel nung Anitet 20:7 nung angur. Yamaji, Ao Senden ya Ao kin madak tematiba Mungdang (apex body) lir. Anungji tan ASLB-i Ao calendar tai nung, ‘Ao Senden temelaba agir adoktsür’ ta sangdongba ama, project tai inyakba nung shinga nema Ao Senden tenüng metetshi daktsütsüla.
b) Tan Ao Senden-i ni parnok kilemi jaokba mapa yabo, Ao Senden ama, azük nungi ita, petinu ama Aor-i akhüm tsübua züngshiba Mungdang kadi, onük tilatiri ka atema, telephone agia jembitepa angatetteptettsü mapa tilaka, asoshi Ao Senden official writting pad amshia jurila nisung, individual ka jaokba yabo oda, Ao Senden akhümket dang nungi kanga parnok sasa nemzüka aluba mapa (below their prestige). Anungji Ao Senden akhümket, mera aketbaji parnok sasa nemzüka meludaktsüi kümzüka ayutsüla.
Yirusalem nung amitsür kati poisa temerem ana, tangar dang mesayui, tekai agi ajepbanger tenla inoktsüba ama, ni tambur, asa-taoi süaka, leper nung memejang tashi Ao oshi aser literature renlokdaktsüba süaka, leper nung memejang tashi Ao oshi aser literature renlokdaktsüba nung nia kü tenla tila agütsütsü renema lir. Ao Senden aser ASLB den angatettepa inyaktet asübo koda jungla ta ni-a khenkhenbo bilemer.
Ao calendar tai ya agientsüba nung Ao Senden-i tangatetba tajung arua parnoki ASLB dang “Calendar ya agienang, withdraw süang” ta ashitsü imlaa atadi.
Ocet tatem.-