Ao Kaketshir Mungdang-i mangyim o lemsar

Mokokchung, November 01 (Agencies): Ao Kaketshir Mungdang (AKM) menden ajanga takotet lanur sangmongpi, Dr. Sentitemsu Imsong akümli wadang tembangba osang angashidang kangasa mamangteter aser tesasaba osang lemsateper, ta sangdong ka nung AKM President, L. Jemti Longchar aser General Secretary, Bendangkumba Aier nati sangdong ka nung metetdaktsüogo.
Sangdong nung Dr. Sentitemsu iba lima nungi pila-a osang angashia ya pungmang ka ang südaktsünüali ta bilemer. Pa ama takotet lanur ka taküm iba lima nungi akümli wadang tembangba ya kecha agia memelenzüktettsüsa takoksa kangasa ulura kechiba süra pa dak tarutsü putu puin jenjang tulu ajangzükteta alima tejakleni anir aotsü teimla tulu yua aliba tanü asenok nungi pilaba ya shibai abensadaktsütettsü ta kangasa rongjena sasaseta bilemer, ta AKM ajanga metetdaktsü.
Dr. Senti taküm tembangbaji alima puin tsütsü takoksa ulura talisa Ao atema kangasa takoksa tulu ka lir. Tsüngrem Teyanglusangsa tajungba ta angateta pa alima nungi pilaba mapang taochi, tesüneptsüba maneni tsürabur, adianu, kinunger aser mangyimertem ajak den dena liangma, ta Ao Kaketshir Mungdangi sarasadema atar ta sangdong ajangasa lemsatep.