Ao Kaketshir Telongjem Dimapur ‘Homeland Tour’ takok ngua agiogo

Dimapur, April 14 (TYO): Dimapur nungi Ao Kaketshir Telongjem golden jubilee amongba tenüng nung pei tsürabur lima semdanga jajartemi tanep Honibar anepdang Impur nung ABAM executive secretary den sensaksem mapang tajung ka agiogo.
Tanep iba sensaksem sentong Nokinketer Mongchen (ABAM office) nung akadang, akhidang asenok shiruru ama tia nung alidang pei jangratema lia aliba lima aser kiojen tajung ajak toktsür America missionary temi asen lima tashi arua asenok tanüla aser tashitemetet nung Tsüngremi asenok nüchi kümdaktsüba asoshi asenokia tangar asoshi tajung inyaktsü renemtsüla ta ABAM executive secretary, Rev. Dr. Mar Atsongchangeri ayongzük.
Paisa lanurtem dang pei tsürabur lima tenzüktsü asoshi ajungshia liasü.
“Impur ya Naga nunger asoshi mezüngsa mapa jenti inyaktetba tesem ka lir, yangi 1895 küm school lapok aser 1912 küm Hospital lapok,” ta Rev. Dr. Mar Atsongchanger-i metetdaktsü.
Joko, 1897 kümbo Ao Christian-temi tangar Naga kintem dangi Yisu temeim osang tajung bener aotsü lemtet ta ABAM executive secretary-isa ashi.
Tanübo joko ABAM ajanga lanurtemi China nung dena Working visa amer oa Tsüngrem mapa inyaktettsüsa lenmang sadema lapokogo ta paisa metetdaktsü.
Tanep iba sensaksemba mapang AKTD lenirtemia Tsüngremi asenok nüchi kümdaktsüba asoshi Tenüngsang agütsüba anogo ka shimteta government-i anir kibong ajak nung among junger ta shidanga liasü. Iba tenüngsang agütsüba anogo yabo tenla saruba mesüra agütsüba anogo masü saka pelatepa arogo pur aser kinungertem sarasadema chiyongtepba anogo ka asütsüla ta parnokisa lemsatep.
AKTD purtemisa clean election takok angutsü atema voter Id card o aadhaar na sendakteptsüla aser Sunday school lesson nunga enoka sayutsüla ta shidanga liasü.
Parnokisa Nagaland nung yi nokdangba mapa takok angutsü atema “Prohibition Declaration Day” among junger ta metetdaktsü.
Tanü AKTD purtem Akhoya nung Clark kürakyanglu repranger yangji sarasadem mapang ka agi aser ano Dr. Clark-i 1888 küm yangluba yinzü apu nung jajar külen yangjia Dr Clark mapatem bilemteta sarasadem mapang agia liasü.
Anogo asem tashi tesem balala sema senzür AKTD golden jubilee amongba tenüng nung aortem Honibar aonung Dimapur tonga aruogo.