Ao Kaketshir Telongjem Dimapur-i Nagaland tensa atema shisabulur

Dimapur, July 12 (TYO): Tawa Nagaland nung ajurua aliba tensa aser sorkari teinyaktsü mapa meinyakba atema kanga shisabulua bilemer aser kaketshir tentet ka ama, asen lennirtemi state nung timtemtem hau ta melii pei ajangzüktsü atema dang bilema inyaksangshiba angudang kanga süoki ia bilemer, ta tanü Ao Kaketshir Telongjem Dimapur (AKTD)-i sangdong ka nung metetdaktsü.
Nagaland tesem balala nung tzümetsüng aser anentsüh lendongtem ajurua aliba den külemi state sorkar nung züngsemtem tsüngda tashi raktepba mapang ka nung, ano tia maka 4th Mile (Dimapur) nung apu chirepba lendong atalokba ajanga state sorkari teinyaktsü mapa meinyakteter ta kuli sayur. Sorkari mapang shitak nung mapa inyak asübo, Monglulbar nikongdang atalokba lendong ya majurui lila, ta AKTD-isa ashi.
Iba apu ya Niuland aser temeket alirtem atema lenmang tongtiba liasü aser tang-a sorkari mapa meinyakba ajanga public-i timtem ajuruogo. Iba lendong bushisüngdangtsü atema Cabinet-i enquiry committee ka tentetba osang angashidang temulung züreper, kechiyong sorkari mapang shitak nung mapa meinyakba ajanga dang iba lendong atalok. Asen lennirtem zübazülemba aser nübortem ola hao ta melii toktsüba yimya ajanga public mezüngmeshir.
AKTD-i yimten telok mesüra teloktep kecha dena sentaktepa mali mesüra pusema menungiter, saka ochimashi lennirtem kabu nung nübortem peria dang timtemogo ta bilemer. Asenoki shimtetba lennirtemi pei ajangzüktsü atema rongsen aser kiojentem dang bendentsü tebilemba lir amai ajiteter.
AKTD-i Clean Election Campaign pusema nungitba nung masetshii nokdaker aser lanur ajak dang election nung ochimashi inyakyimtem nungi jenbua alitsü ayimoktsür, ta sangdong nungsa shia lir.
Mongulbar nikongdang apu chirepba lendong nung tasürtem kibong aser kinungertem den AKTD-i asükhu lemsateper ta sangdong nungsa metetdaktsü.