Ao kaketshirtemi Dimapur nung park yanglutsü

Dimapur,June 21 (TYO) : Tanü Hokolbar nü Nagaland PWD minister, Wb.Tongpang Ozükümi Dimapur nung Hotel Saramati anasa Ao Kaketshir Telongjem Dimapur purtemi yangluba Jubilee Park ka den külemi nübortem asoshi angati tzü tajung ajemdak tesem ka semzüktsüogo. Iba Park aser Free Public Drinking Water Booth ya AKTD 2018 küm Golden Jubilee amongba tenüng nung nübortem asoshi Jubilee sempet ka amai yanglutsüba mapa ka liasü.
Iba sentong nung jembidang, Dimapur nung Aor kaketshirtemi nübortem asoshi tagitsü rongsen asütsüsa mapa tajung tulu inyaktsüba asoshi Wb. Tongpang Ozükümi tenüngsang agütsü. “Iba ama nübortem asoshi mapa tajung inyakteta toktsüba ya ajak asoshi tatishitsü tajung asütsü aser kanga nümadangtetter,” ta paisa kanga pelaba o ka shisem.
Iba ama nübortem anisüngzükdak yanglutsüba ya kazüdak dang masü saka iba ama tesem nung süngdong tema anepaluba agi tzü mopong merüka akümtsü aser alima kümzüktsü ta PWD kilonserisa ajungshia metetdaktsü.
Dimapur ya asenok meyong ama bilema mapa tajung inyaktsüla, ibai asenok yimti anungji asenoki kibur küma anepalutsüla ta paisa ayongzük.
Iba sentong nungsa jembidang, AKTD Golden Jubilee Planning Committee nung Convenor, Wb. K.Temjen Jamiri ashiba agi, AKTD Golden Jubilee amongba tenüng nung nübortem asoshi mapa asem inyaktsüba rongnung mezüngbubaji yaküm 5th June nung Dimapur Govt. College, Naga Cemetery aser ISBT nung süngdong temtsübatem kanga junga meyitetdagi, tanabuba nung PWD lemjem nung Yimkong Sidewalk yanglua iba long jara feet 1000 dak tali nung noksa teptsü aser tasembubaji tang semzükba Jubilee Park aser Free Public Drinking Water booth ya lir. Item mapa inyaktsü atema kaketshirtemi Nayasa company Mumbai nungi waste bin meyirijang ter yanglua bener arua ayok aser iba nung jagi kakeshirtemi sen lakh ter dak tali aatet ta paisa ashi.
Item mapa nung yariteper kija kibong aser lokti tentet aser Arogo ajak dang kanga pelar ta Jubilee Planning Committee tenüng nung Convenor-isa metetdaktsü.
Iba sentong nungsa jembidang, Development Authority of Nagaland nung mendenbuba Wb.A.Nyamnei-i Aor kaketshirtem dang pei tsüraburtem mesüka nübortem asoshi mapa tajung inyaktsüba atema pelaba o metetdaktsü.
Kasa sentong nung Naga Council Dimapur tir Wb. Bangerloba Longkumer, Dimapur Naga Students’ Union tir Wb.Sedevilie aser Ao Senso Telongjem Dimapur tadong tir, Wb. M. Toshi Pongen nungertemia tepela o jembia liasü.
Iba sentong nung Dimapur Ao Baptist Arogo nung Associate pastor Rev.Ariba Imcheni Jubilee Park aser tzü ajemdak ajak meshiteta sarasadem aser AKTD Executive Convenor Wb.Lanutoshi Aier-i shilem agir ajak dang pelaba metetdaktsü. Iba sentong nung AKTD Jubilee Planning Committee nung tezüluba Wb.Mozen Aier menden liasü aser DABA nung Mission Director, Wb.Limaakümi sarasadema sentong tembang.
Iba sentong nung Dimapur Watsü Telongjem, Dimapur Ao Lanur Telongjem aser Tenants’ Association, Naga Shopping Arcade nung lenirtem den kaketshirtem aika arua denogo.
Joko, tang nungibo Jubilee Park nung tanur tain ajak arua anisüngzüka kazütettsü aser mashi mapang angati tzü tajung tenzüka jemtettsü. Ano, iba park nung outdoor fitness equiptments aser tanurtem asoshi swing aser see saw nungertem yutsütsü kaketshirtem tebilemba lir.