Ao kin asentenshi sentong takok ngua agiogo

Tatembang aonung sentep nung Yimyu Baptist Arogo choir-i ken ajanga Tsüngrem osang abenba noksa nung angur.

Mokokchung, Nov 3 (TYO) : Nov 1 nungi tenzüka anogo asemnü tashi yangi Imkongmeren Sports Complex Mokokchung nung Ao Baptist Arogo Mungdang-i ayongzüka Ao Kin Asentenshi sentong ka “Kibuba Onok Asentenshijang” omen nung ajemdaker takok ngua kaogo.
Anogo asemnü sentep balala nung Rev. Maong, Rev. Imdangmeren, Rev. Lanuyanger, Rev. L. Kari Kichu Longchar aser Rev. Kilang Jamir nungertemi Arogo, Lokti, Kibong, Yimden aser kija taküm asentenshiba onük balala nung ajemdaker Tsüngrem osang abenba ajanga jenti pur tenela nung temoatsü balala ngudakja liasü.
Ao kin asentenshi sülen teinyaktsü mapatong kar mungdangi renema yuogo. Mezüngbubaji; iba asentenshi sülen peipei yimtsüng aser Arogotem nung tadok meshiba aser tenüngsang sarasadem sentong Deobar anogo ka shimteta ghonda ana November mesüra December tsüngda pei Arogo mapang apir agitsü renem.
Tanabuba nung, Ao Baptist Arogo Mungdang küm 150 Sesquicentennial ajungba nükla nung kasa asentenshi sentong maneni taruba küm area aser tsükong wise lemsar agitsü, mungdangi agizüka yuogo.
Tasembuba nung, Aortem tai toktepba aser yimjung yangluba nung maneni shilem agitsü aser iba nung Arogo aser mungdangi shilem agitsü renema liasü.
Tatem sentep nung Rev. Kilang Jamiri kija taküm shia nung asentenshi adoktsü asoshi chichiba tekümtet tejangja anguba den tanela temeshi agizüktsü asoshi Ao kin dang tayongzükba agütsü.
Iba asentenshi sentong dak sentakba nung shirnokisa lenla balala ajanga yaritepogo, parnok ajak dang Ao Kin Asentenshi organizing committee convener, Rev. Ponen Longchar-i mulungnena pelaba lemsatep. Iba asentenshi sentong nung Mokokchung district alirtem dang masü saka bendang balala nungi nisung aika arua shilem tajung agia aden.