Ao kin asoshi tepela ka lemsar

Indian Union nung Nagaland temeja State December 1, 1963 nung aküm. Iba sülen mezüngbuba ‘election’ January 1964 nung agia Nagaland Legislative Assembly February 11, 1964 nung lateter joko küm 50 abensaba, Hon Jubilee 2014 nung mungogo.
State kümer liyonga arudang, Tsüngremer maongka tulu ajanga asen Ao kin nungi nübu jenti Nagaland nung tenzükba wadang balala nung tongti shilem aser tematiba menden, oda Chief Minister, Minister aser Chief Secretary menden nungi tenzüka ‘Government Departments’ aser ‘Organisations’ ajak nung tematiba lenir jenjang, nisung aikati tongtetogo aser itemji alima otsü nung teti alitsü.
Yamaji, Nagaland Legislative Assembly nung tematiba mendenji Hon’ble Speaker, aser iba nung nisung 13-buba tang lir. Iba thanglaji, Hon’ble Deputy Speaker aser iba menden nung tenzüker nisung 18 tashi liogo aser Office ketdangsüba nung Secretary temaba lir. Nisung aikati retreta bilema malitsü südi, saka tang tashi nung Ao kin nungi Assembly nung Speaker ataba otsü mali. Office menden nunga, Asür I. Soyah (Longkhum) dang March 2004 nungi March 2005, oda küm ka, Secretary inyak.
Aji oda, Ao kin nungi, ni, Chubatemjen Ao, Deputy Speaker June 21, 1989 nungi April 19, 1990 (ita 10 shi) inyakba sülen Küm 25 dak tali lir külen tanü Hon’ble M.L.A, Wabong Imtikumzuk, kasa Hon’ble Deputy Speaker, Nagaland Legislative Assembly, shimtetbaji nisung ajak dang nungi ni tepelatiba ta akümer aser ni aser ozü kibong tepela aser tetushi tulu den Tenüngsang (congratulation) agütsür. Tsüngremi pa tenzükba wadang aser lenisüba nung maneni Naga nunger, oda tongtipangsa Ao kin atema moajangma ta ozü sarasadem.