Ao kin ayak tetsü oshi shisanga wazüktsü ayongzüker

Taoba mapangtema asen Ao kin lenir tern aser tashi-temeteter aikati asen tetsü oshi ya ketasena ajaki angazüka shia meteta jembitsüla ta sayua,zülua aruogo, Saka  aikati kecha balaka menüngdak ama bilema aliba tendak ka, iba wadang nung tenzükertem aser lenir rongnung arok telemtetba ka mekateti aruba ajanga küm aika mapang tajung suidaktsüogo ta sasa bilemer.
Tanübo Sorkar sentongtem nung  aser alima yimsüsertemi kin shia ayak  jangjatsü atema oshi-oben renlokdaktsütsü sentong tapu balala atonga pei tetsü oshi  renlokdaktsütsü atemzükba tensa mapang kati asenok menepogo. Taoba 12th, June’2016 anogo Assam & Nagaland Governor Wb.P.B.Acharya-i Dimapur nung osangzülur den jembidang, Nagaland nung tetsü oshi renlokdaktsütsü asoshi pai sentong ka yangluba indang ashidang, “Ni NAMMASTE” ta sür sentong ka tenzüker, idakji Naga nungera pei tetsü oshi renlokdaktsütsü asoshi sentong ka asütsü, iba sentong ajanga India lima Western & Southern Indian Universities ishika den North Eastern nung aliba Universities nung kin balalai jembiba tetsü oshitem sayutsü atema maparen renemdar ta ashibaji asüngyongi mapa küma aotsü.  Idangji Ao kin-a asen pei tetsü oshi sayudaktsütsübaji Marathi, Telugu, Malayalam, Hindi aser Assamese oshi jembirtem nem sayudaktsütsüba masü, Aor jala-jabasotem nem sayudaktsütsü wadang asütsü. Taoba küm ishika nungi tenzüka Ao Senden Literature Board-i acha-ayanga Ao oshi nung syllabus yanglua nüngdak kakettem shimteta aser tasen menünga Arangtet tatidang agia aruba ngua kanga temulung chia repranger, Saka tanü lanur aikati Ao oshi tatidang agütsütsüji kecha menüngdak amai bilemer. Ano, aikati kanga ilaa akümer ama bilema temolung magütsür.HSLC nungi Graduation tashi nung marks tajung ngua alirtem Ao oshi tatidang nungia takok nguteta temsua renemer ishika ali asübo tawa SCERT/RMSA-den timtem to majurula.
Tanü Aor-i moa Ao Senden Literature Board nung lenir aser ketdangsua yarir Prof Dr.A.Lanunungsang, Pro-Vice Chancellor Nagaland University (Rtd) pai anir ASLB Research Wing ta sur Luden ka tenzüka Aotsür Aortem nungi English Literatures aser Linguistics nung doctorate degree (Ph.D) angurtem College Principal aser University balala nung Professortem ishika den wadang balala nung takotet lenirtem ishikati kanga nüken belem arema asen Ao oshi nung University tashi nung amshitettsüsa ‘’Arok  Ao Osep” kaket ka adoktsü renemdar. Iba mapadong ya Ao kin ayak shisanga wazüka ayutsü nukmen ASLB-Research Wing Luden-i tenia olura inyaker ta Ao Senso Telongjem Dimapur-i angateta tashi agi nungiter.
Anungji, taruba küm 1st March’2017 nung jagi Dimapur lima alir Aor kibong shia iba Arok Ao Osep kaket ya kakabosa lema azüng tenzüktsü ta asen yimteni lemteta tang Tzükong ajak nungi yimtsüng telongjem kibong shia jelia sen Rs.200/- sarudentsü osang agütsüogo.Takataiter aser tangatetertemibo kaket kaji dang masü chirnur ajak atajema aser makamaiter nema lema agüjaa züngdaktsütsüsa talilaa alitsüsa ajaki pei tata shilem agitsü maneni nenshia ayongzüker.

Sd/-                                                                                           Sd/-
Supu Jamir,                                                                           C.Onen Walling, 
President, ASTD.                                                                 General Secretary, ASTD

You must be logged in to post a comment Login