Ao kin jenjang ajaki shisadanga asadangtsüla: Rev. Imdangmeren

Ao Kin Asentenshi sentong nung Rev. Lanuyanger-i jembiba (abelen), Chungtia Baptist Arogo Choir-i ken atenba aser  ajichilen noksa nung Rev. Imdangmeren-i jembiba noksa nung angur.

Mokokchung, Nov 2 (TYO): Ao Baptist Arogo Mungdang-i ayonga yangi Imkongmeren Sports Complex Mokokchung nung “Kibuba Onok Asentenshijang” omen nung ajemdaker Ao kin asentenshi sentong ka Nov. 1 nungi tenzüka tanü agi anogo ananübuba kaogo.
Anepdang sentep nung Tsüngrem O jembir Rev. Imdangmeren-i “Loktiliru Asentenshi” onük nung ajemdaker jembidang, loktiliru nung asentenshi adoktsü atema ajemalutsüla, ajemalubaji libaliru tashiji lir, aser ajemaluba nungji wainshin keta lir aser wainshinji loktiliru nung tashi lir, ta ashi.
Loktiliru asentenshitsü asoshi, kati ka dang taoba ta meimteptsüla aser akhümtsübuteptsüla, Ao kin kong nungi aru aser tang koba jenjang nung lir aser kechi mesüka alir ta asübaji nisung shiai shisadanga asadangtsüla nüngdaker, ta paisa shisem.
Pei tetsü oshiji loktiliru asentenshiba nung tongtibang shilem ka lir, anungji, Ao kini pei tetsü oshi mesendoki meima jembitsü asoshi paisa ajungshia liasü. “Shir kini pei tetsü oshi mejembir item kinji samadoktsü,” ta paisa indang dak sentakba nung olen ka shisem.
Taoba mapang takari sensaker meim aser sensakeri takar tushia aru, saka tanübo ibaji mali, ibaji loktiliru memetetba ajanga lir, ta paisa tuteta ashi.
Lokti nung asentenshi adokba nung teinyaktsü kar lemsatepdang, sobusolemtsü timi sobuba, cell phone yimya meteta timyim nung amshiba, jayajako timi benshiba, akhümtsübu agütsüba, temenen nungi pilaa alitsüba indang Laishiba tekong tapet bener arua tesentepertem ayongzük.
Oshi tasen ka jembitsü asoshi ashidang, “Ao kinji meshimetsüba kin ka masü, anungji, kua ta masü saka ang” ta asüba kin ka asütsü, paisa ayongzüka liasü.
Aonung sentep nung Rev. Lanuyangeri “Kibong Asentenshi” onük dak ajemdaker jembidang, temenen agi Aor kibongtem aika nung Tsüngrem adenba mali kümogo, Pa adenba asenoki aridokogo, anungji, asen temenentem kukua nangzüktsüla aser Tsüngrem adenba kibong ka asangsang südaktsütsü asoshi tayongzükba agütsü. Tsüngrem adenba kibong kaji atamata jenjang masü aser ibaji züzüa magitsüla, ta paisa shisem.
Tsüngrem O ya ain aser taküm O lir, anungji Tsüngrem adenba kibong ka asütsü asoshi Aor kibong shiai Lai O nung tera yanga iba nungji libaliruba kibong kaka asütsü asoshi paisa ayongzük.
Tanü sentep balala nung Chungtia Baptist Arogo Choir aser Chuchuyimpang Baptist Arogo Choir-temi ken ajanga Tsüngrem osang aben. Iba sentong nung Mokokchung district nungi dang masü saka Ao senso bendang balala nungi nisung aika arua temoatsü balala ngua dendar.
Nov. 3 Hokobar anepdang sentep nung Rev. L. Kari Longchar-i “Yimden Asentenshi” onük nung aser aonung sentep Rev. Kilang ajanga omen “Kibuba Onok Asentenshijang” nung ajemdaker jembitsü. Iba sentong ya local cable T.V balala den you tube nung ‘Ao Kin Asentenshi’ ta sür type sür Live reprangtettsü.