Ao Kin Telungjem (Unity of the Ao Tribe)

~ Y. Imti Tzüdir, Nuton Bosti, Dimapur.

Temalen agüja aliba onük nungji amendaker asen Ao kin Chungliyimti alidang nungi koma lungjema aru mesüra koma meputepi aru tatsü agi lemsatepner. Ajaki meteta alinung ni tetuyuba ama point dang kar shinür. Apidanga arura asen Aorji lipok nungi melungjemi aru ta tatalokba otsütem ajanga angateter. Item rongnung tongmelang agi kar yamai agütsür:-
1) Chungliyimti alidang Tzüdir kidong süngo tuo mozü ka ngutetba ajanga nütsüng aika rena ao. Saka parnok tangar kin dang nungi balaka ngasangatema aliba agi yimertemi par kin majinü nung merenshitsü mapang tajung ka (chance) repranga ata. Kenü Longtisanger sü achitsü alidang iba mapang tajungji adoka Tzüdir kin lepreptsü. Atangji karbo anüng aser lia lia rena ao. Iba ajanga asen tetsü-tebou nungi telungjem aser temeimtep maliba angateter.
2) Kodang Aortem Chungliyimti toktsür yim tasen ka akümtsü Tzüla (Dikhu) ayong leni apuso. Iba ayongji ajangtsü atema parnoki ar agi apu ka yanglu. Iba apu jagi nisung aika ajanga aru. Anungji tanüngba ajungaji arudaktsü nungbo alima tasenba jagi masemtsü ta parnoki bilemer apuji lepdanga yutsü. Ibaji ajanga tanüngba nisungtem ayongji majangtet nung meyipa aotsüsa aküm. Külemi arur sür nung yamaji mezüngmeshia aser maochi-i inyakba angateter.
3) Parnok arur Aonglenden nung yim küma ali aser tesülen iba anasa tesem kati oa ali koba dang Koridang ta ajar. Idakji lia lia joko nütsüng tali renloka aoba agi tesem balalai orr yim kümteta soyapokya-a ao. Aortem Soyim (Aonglenden) aser Koridang nungi ano tesem balalai orr yim kümteta yimtsüng kümteta ao. Saka tesülen item yimtsüngtem rongnung tetsükchitep adoka leptep tsüngtep tenzük. Yamaji tangar kin den masü saka asen Aor rongnung yim kati yim ka amak aser makokba yim jagi takokba yim dang “OBA” jadaktsü. Atangji tangar kin dena tekolak bushiba mapaji inyak, saka asen Aor o Aor na yongtsü timba atalok. Iba yagi Aortem rongnung temeimtep aser teyaritep maliba tejangja sayur.
Item tatalokba ajanga sayur lipok nungi asen Aortemji anemtep liasü. Tangar kinbo parnok soyapokya arudang asen Aor amaji tetsükchitep adokba mangashi. Atangji tekolak bushiba mapaji parnokia inyak saka tangar kintem den timba inyak.
Khristan yimsü agizüker külen tangbo tekolak bushiba mapaji mali sakasa asenok Aor rongnung tetsükchitep kanga lir ta ashitsü akok. Yim ka nung alirtem rongnunga sünga mangatettep aser anemtepa dang alir. Yimtsüng kar nungbo pei yimer sürnung senso nung metendaktsüi jentokba aser yimtsüng nungi aridokba tashi ataloka lir. Tzükong o tzükong tsüngda nunga mangatettep lir. Khristan ka ama lai tesayuba ama litet nungbo koda jungla !
Yimtsüng shia nung yimten takang tenteta yimsü asür; Senso Mungdang tenzüka lir, kidong kidong telungjem mungdang tenzüka lir, Ao Senso Telungjem Mungdang tenzüka lir, Tzükong shia nung telungjem Mungdang tenzüka lir, Town balala nung alirtem pei yimer Union, pei tzükong Union, aser Ao Union ta tenteta lir. Ibai tim mapa ka lir, saka shitakba telungjemji mapa agi sayur asü masü. Shin o nung yamai shia lir, “Telungjem nung tashi lir” (Unity is strength). Ano yamai ashir, “Lungjemba agi noktaker, lemsaba agi laor”. (United we stand, divided we fall).
Tatishitsü kar : Kodang Niuland len Assam nunger o Sema nunger na ali raktep tenzük, Sema nungerbo Zunheboto len alirtema yimtsüng ajak nungi arua par nisung yari aser aliji rakzüker meyok. Lotha nungera Assam den arrtsü nung mangatetep adokdang yimtsüngtem nungi arua yari aser takok angu. Süra iba amaji asenok Aortema boundary issue nung teyaritep alir asü masü. Timtem nung yaritepbaji dang shitakba telungjemji mapa agi (practical) sayur. Kodang Angami nungeri Khristan yimsü agizük par ajanga kishikina nung aliba kintem e.g. Chakhesang, Rengma, Zeliang, etc. parnok ajanga Khristan kümdaktsü aser parnok telungjem tali aküm. Tanüa iba kasa telungjem parnok rongnung lir. Asen Aortemia anüdoklen aliba kintem, e.g. Sangtam, Chang, Yimchunger, Kongyak, Phom, Khiamnuingam etc. Khristan kümdaktsü aser kaket shisatsü angazükdaktsü. Saka tanübo parnok karbo Aor anemer kümogo. Ya shiba tai? Ni bilem nung ya asen Aor tai ajanga asütsü südi.
Anungji asenok Aortem dang ya ayongzüknür: asenoki o agi masü saka mapa agi shitakba telungjem aser teyaritep, asenok tsüngda aser tangar kin danga sayudi.