Ao Laishirtemi yimten aser Arogo nung Ochishia inyaktsü indang jembir

Clean Election atema Laishirtemi temulung agütsütsüla

Longmisa, May 27 (TYO): Tanü Laishirtem ya loktiliba nung temelenshi tajung bener arur telok ka asütsüla, kechiyong laishirtem ya nübortem teimla samar alidak teimla tasen bener arutsürtem lir ta Parliamentary Secretary, S.Chuba Longkumeri metetdaktsü.
Pai iba o ya tanü Honibar nü Longmisa yimtak Ao Theological Association inti mungdang nung tayongzükba o jembidang metetdaktsü.
Paisa laishirtem dang Nagaland nung election timi agitettsü asoshi akok tashi shilem agitsü mepishia metetdaktsü. “Clean Election mapa ya takok ngua inyaktsü asoshi laishirtemi temulung agütsütsüla,” ta paisa ayongzük.
Election ajanga asen lima raksaba meyangluteti alidang küm pongo süir aser tanaben election mapang atonger. Iba teraksa yanglushitsü asoshi talisa Ao kin tebilemtsü tulu lir, anungji laishirtemi putu menden nung yimsüsürtem den longjemer tang tashi nung tim mesüi agiba election maparen ajak metongshia inyaktsüla ta Wb.S.Chuba Longkumerisa metetdaktsü.
Paisa Longmisa Arogo aser yimteni iba ama laishir mungdang agizüka mongdaktsüba asoshi pelaba metetdaktsü.
Tanü mezüng senden nung mungdang onük ‘Loktilibaliro aser arogo nung Ochi Kuliser Taküm’ ta asüba nung ajemdaker Rev.Dr.Takatemjen aser Dr.P.Kilemsüngla nati jembia liasü.
Kasa onük nung Rev. Dr. Takatemjen-i jembidang, loktiliba nung (public life) kulisür kati light bill shidak agütsütsüla, shishilembaba nung ochi shia inyaktsüla aser election mapang vote shitak agütsütsüla ta shia liasü.
“Tanü lokti nung tiyazü agi sünga inyakba teraji maparen ajak nung ochimashi kanga inyaker aser iba jagi lanurtem aika mapa mangu kangshiteper, anungji item timtem nungi nübortem anitettsü asoshi nüburtemi ola adoktsula, osangkaket balala nung ocet zülutsüla aser school text book aser Sunday school syllabus nung moral education inoka sayutsüla,” ta paisa metetdaktsü.
Kasa sentep nung tanabuba o jembir, Dr. P. Kilemsunglai ‘ Arogo inyakyim nung Ochi” indang jembidang, “Arogo nung ochi kulisür adoktsü asoshi Arogo nung lenir shimba nung teshisadangtsü lir, arogo nung sentongtem agidang Khrista tiyongtsü sür agitsüla, nüngdakba pur aser tepetzük tia nung aliba arogopur asoshi lenji oa lenmang kar nungbo yaritsüla, tenla tenji zülur alemba nung tajangzük aser tamajung anaprongla dena lir, anungji iba ya khen reprangshitsüla, arogopur rongnung ita sen sarusaji balala saruba ya shisadangtsüla, arogo tenzüker nem taa shitak agütsütsüla, arogo nung tetsürtemi tongti shilem agitsüla, pastor ajanga theology azüngi aortem asoshi kuli shitak agütsütsüla, arogoi clean election, human trafficking aser prostitution onüktem nung tongti shilem agia inyaktsüla,” ta tereprangtetba aser rongdak nüngdak teinyaktsü tongtibang kar lemsatep.
Kasa anogo aonung sentep sentong nung “manokshiba tamang” onük nung ajemdaker Rev. O. Alem-i jembidang, “Tsüngrem tenzüktsü asoshi Tsüngremi ajaba meteta Tsüngrem O azüngba laishirtem tenzükba mapa nung takok angubaji asenok masü saka Khrista ajanga lir,” ta nenshia metetdaktsü.
“Naga lima yanglutsü asoshi Arogo medeni yanglutsü makoktsü, arogo Otsü mejembi Naga lima otsü jembitsü makok itemji angateta, arogo nem Tsüngremi tashi ajak agüja alinungji Tsüngrem tenzükba mapa nung tasü itta inyaktsüla,” ta shia liasü. “Matt. 7:21-23 nung ashi ama, Tsüngremi tatem anogo nung asenok shibar memetet ta mashitsüsa atentena aser pelaseta Tsüngrem tenzüktsüla,” ta paisa Laishirtem ayongzük.
Kasa aonung lanurtem nem Tsüngremi agütsüba sempet tapu balala ajanga Tsüngrem temeim kuli süa liasü.
Iba mungdang ya Deobar aonung tembangtsü. Iba tatembangba anogo mezüng sentep sentong nung SBC Principal, Wb. Tsüknung aser tesüsaba sentong nung ABAM Executive Secretary, Rev.Dr. Mar Atsongchanger nati Tsüngrem o jembitsü.