Ao Lima “Land Of Revival”

I. Imdong Jamir,  Sungkomen

(Yashi adok nungi…)
Temeim Arogo lenirtem, Arogo tenzükla, tenzükertem kibuba Yisuer tsükmenatsü lu nung tenzükertem kibuba Yisui temeim mapa indang jembiba o rongnung tongtipang kar. “Saka nenok asoshi kotak nung rongsen rizüngang.” Mt. 6:20, asenok ajaki chirnur semchi semnur ajak yutsür asütsü, saka kibubai asen mapa tajung kotak nung rizüngtsütsü. Putir Zakarie Abia nübur liasü, pa kinungtsü Aron semchir ka tenüng agi Elisabeth liasü Luk 1:5. Alemli tebu Aron shiba arem min nung Israel purtem asoshi Putir mapa tulu inyak iba temeim mapa tuluji kibuba Tsüngremi rizungja liasü.
Alemli 18th Century alima tazü arem shiruru tia nung alidang American Missionarytemi, ita 6 tzüyim nung jaja arua asen lima atong meyipa reprangrapang ibai tesüngmangtsüka lir. Asen Aokin jilu, jakla, yimya repranga amangertem meyirjang aika lir. Anungji kibuba Tsüngrem matsüngdang kümkümshitsü, aser Revival tanüla milak, yokang langpang nungi ainkar o jembir lanur shisashir tajung adokdakjang ta temulonger meyirjang 50, 60-i bo sarasademtsü tanü mapang lir.
Israel kin otsü reprangdang temeimtsü tia nung arua lir. Yakober kibong Padan Aram lima toktsür pei limai apusotsü pungmang nung jembi. Par kibong apusoa arudang Yakobi kanga khuret bena jipa kudi Esau shibai ni aser ozü kibong ajunga lepsettsü osang yoka lir iba lendong nungi kümzükang ta pai aiben jeba sarasadem. Yakob sarasadem langzüa Jabok ayong ajangdang aonung KOTAK TENYAR ajurua pa Revival tanüla temishi den melangtep. Tsüngremer sentong tulu. Iba anogo pa Yakob nungi Israel tenüng melen, sentsü senpong, temulongjang ajak revival agia melen. Yakobi ashi “NI TSüNGREM TEJAK NGUOGO.” Lip 32:30 Kotak tenyar den melangtepdang Yakob tebi loktet, ajisürbo pa atoka-atoka jaja. Iba anogo nungi “Israel chirtemi tepi tazüng shi tetsü tanü tashi machir.” Lip 32:32. Iba anogo nungi Israel chirtemi kibuba Tsüngrem den tali sendaktepa jaja. Yakob nungi Israel ajabaji (Revival lir) Zefania ainker ajanga kibuba Tsüngremi ashi NI MILEN AMER YIRUSALEM BUSHITSü Zaf 1:12. “NI MILEN AMER AO KIN BUSHITSü.”
Asen Aokin asoshi tanüla akar tamang tir American Missionarytem angati tanüla nüktzü agi mangyima jeber aoba otsü lir. 1948 May 14 nu Israel kin nüchiso angu. Prime Minister David Ben Gurin-i anir Israel Parliament nung jeptepa Tsüngrem nem tenüngsang agütsü. Pai American President Trueman den ajurutepa küm meyirjang anashi alar süngra nung aliba kibuba Tsüngremi onok anitetogo, ta tepela salem o jembidang Tamarener tulur tenapronglai Tsüngrem nem tenüngsang agüja sarasademdang tesüiba tia bilemteta kanga ajebba otsü lir.
British nungeri alima ajak amokbanger aliba mapang Sibsagarh nung British nunger Maj. John Butler-i “A Sketch of Assam otsü züludang Naga nunger arem shiruru, tetsübutsüka, tesempatsüka, suro-pangru arem shiruru jakden, mangsa tekolak dang bushirtem ta pai jembia zülu. (Ibai Sibsagarh nung) Iba anogo nungi American Missionary shirnok America pei lima toktsür Assam arua atong parnoki yamai jembi “tanü tekolak bushirtemji pa ajanga Khrista bushirtem kümdaktsütsü.” Alemli tamangtir American Missionary temi shienba o temji asen Aokin dak mongja monga lir.
Ao Arogotem nung, kibongtem nung, tetsü tebu-i anir Kibong tekülem kodang agidir, “IBAJI REVIVAL LIR” aser Kibuba pelaba asenokdak amonger. Yoh 15:11. Kibuba Tsüngremi Yakob dang ashi, “Yakob ni nü den lir. na kolenisa odir ni kümzüktsü.” Lip 28:15. Saka Yakob daka tashimait tilaka liasü. Yakobi Leala sempar ta ngua kibubai la nu menden lapokja jabaso 4 sotsü. Yakob o Rachel na tanur masoba len nungi mepelatep adok. Saka Tsüngremi tena temulong tanüla meputepa angu. Lip 29:31. Lip 30:1. Aser Tsüngremi Rachel bilemtet Lip 30:22. Kibong nung Revival akaba ajanga tepela tesünepji tesüngmangtsüka lir.
“There is no greater paradise than peace of mind.” Alima nung kibong nung pelatepa, asaya menütepa, tajung jembitepbaji kibuba Tsüngremi pelar. Tanur kaketshirtem takok osang ajak chirnur nungi Anungji, “SPARE THE ROD AND SPOIL THE CHILD.” Tatemokba chir jagi teti maksü korang bener arutsütsüsa. Kipok sayuba makarbo nükjidongtem mataloker As 15:22. Kipok tesayuba bulua alidak tekümzük lir. As 11:14(b) Kibong nung mepetmesü mulong mepu adokba ajak tebang temeli mazüokba nungi adoker. Iba nungi molumi mi adokdaktsür. Yob 3:6 (a) (f) Adianutem shiba taküm meimer aser anogo tajung nguner tamajung nungi pai pei tanüla aser tiazü mejembitsü Pei tebang mechi sotang. I Peter 3:10. Temeli mazüoktetba kibong kodanga sünepa malitsü.
KIBUBA TSüNGREM ASENOK DEN TETI DENA LIR. Naga tenem nung asen Aor chuba tir menden nung kwi APANGEMERTEM mena lir, walunir kwi lir, takataiter kwi lir tekülem ki tekong tenem ajak nung asen Aor tekülem ki Hon Marble agi yangluba tekülem ki kwi lir. Tekülemi aoertem kwika tetsüng tesa agi arur, meshi-metsür kwi yimdong nung nümzüa lir. India nunger tamarenertem arua lokti nung jembidang temesüng o agidang jembir, parnoki meteta lir. LAND OF FESTIVAL – TO LAND OF REVIVAL ji asen lima lir. Tekülem ki Hon süngkümpongi aitdang lakh lakh jenjang car kar tuluba kar tuluba, tekülem kima sünga yur tekülemi atuba angudang kibuba Tsüngrem dang aakasa aiter. Tekülem nung Tsüngrem o angar senshidang, kima bell atemtsü, kanja, kanja, külen azü asangteper sir, sir ta kilir senteper. Marble langpang nung azüazüa mener pei chir pei jala jabaso den külemi ojala, obala asenok külemi sarasademer chiyongdi ni ta shir sarasadem agi chiyongbaji koda tepelatsü (ALIMA KOTAKJI IBAI LIR) KIBUBAI KOTAK NUNGI REPRANGER TK 33:13. KIBUBA TSüBUBA JAGI ARUSHI ATSüLANGER AS 10:27.
SHAKESPEARE-i ashir “We know what we are, but know not what we may be.” Saka tajung inyaktsü aser teputeptsü tama, kechiyong ibala tenlatem agi Tsüngrem temulong achir. Ibri 13:16.
Oh Kibuba Yisu nü chir kwikati iba osang tajung züngdir par kibong nungi Revival adokdakjang. Amen.
“ANU YIR OAGI ANEPDANG TAJUNG YISU DEN KOTAK NUNG ALITSü. TATEM MAKADAK.” AMEN