Ao lima temoatsü agi Naga nunger jangratemdaktsür

– S. T. Yapang Lkr. Kohima.

Asen Ao lima nungi adokba chiyungtsü aser süngjanglijang Nagalima tesem aikalen prokshia yokyayokjir, item rongnung Kohima Dimapur tashi ayokba dang masü nüburia meteta bushiba aser sapuba kar shinür;
Longkhum yimtiba nungi pingana agir magima Nagalima tesem ajaklen prokshiba ngua kanga pelaa bilemer aser iba ajanga asen Aor, Naga nunger ajak tejak tenteter. Tetsünüribo memeteti alitsüa akok, saka item ajak ya Tsüngremi mapang shitak nung Longkhum pinaganaji menzüka tangzükdaktsür. Asen tenük agi mangur mesüra aseni sentong meyanglu sürnung kobanü nungi tzümar indang tamajung aser sen tasak küma aor iba anogo shitak nung jagi dang Longkhum pingana menzüka ongzükba ajangshia arudagi.
Yajang nungi jemben (orange) talubusa bener arua ayokba Hornbill benjongmungertemia süngmangasa reprangogo. Chungtia aser Aliba amala nungi züngi talubusa tsünüteta belenshia ayokba. Yisemyong nungi mapang shia tapu balala tsünütetba. Changtongya nung Nagaland Banana Chips yanglua prokshiba, Longsa mersü ajaki metetba ka lir, memenui iba yaa Kohima Dimapur tashi tzümar indang mangu timtemba mapang peritsütsü imlar.
Küm ishika tejaklen osangkaket nung züngshiba agi India nunger süngu (Tea leave) mozü tali amshiba agi bendangeri nokdanga liasü. Asen Nagalima nung tzümar indang ayokba ya ashiko mozümora inoka yanglubatem dang alitsü. Shisadangang asenok Ao lima tsünglanglen tzümari külüp tu par lima nung talubusa lir sürnung sen tasakba agi gari totzü tsüka talii atuba ya koda? Ya langka lir, asenok mozü meinoki tsünübatem yanglua parnok bendang limai yoker aser mozü talubosa alibatem asen limai yoka alitsü. Ni mozümora inoka tsünüba tendanger nübo masü, saka mozü koma ali naia tendangtsü akok, nai steel marok temerük ka nung aonung tzümari yangluba süngujok tasen inoka mulur yujang, anepdang saaker reprangdangang yangji temerem tila kata malitsü, saka lishitzü amai dang alitsü, ibaji süngu temeja moluzükba asünungbo yamaji masütsü, asen Ao lima nung yangluba Merangkong, Anüdok, Tzürang Valley, Longsa Tea amala nungbo yamajibo malir.
Item dak alia asen Ao lima nungi amatsük amsang tashi prokshir, ibajia asen li nungi adokba mesüaka asen litsü nung yangluba lir, item ajakji asen temoatsü aser iba ajanga asen Naga nunger tzürademdaktsür.
Ano aonsotsü aser süngjanglijang yim shiai süngmok, lasüng, mersü, kobi, luli, mapu, alo amala asen li nung apetba chiyungtsütem mongpu nungbo Tzümalima nungi bener matuaka asen Nagalima rangpen peritsüsa nükla yur tsünütsü tanü tensai asen Aor dak akanger. Asen Naga nunger aluyimer kin, saka küm piyong Tzümari chiyungtsü tuluba nungi tilaba tashi mozü agi tsünüba alia achiba nungi melenshia aotsü tenzükba Putu ka südaktsüdi.