Ao lima yipru mopung tesashi agi merenshir

Mokokchung District nung Deobar anepdang yipru mopung tesashi ajanga kiojen raksatsüba noksatem.

Dimapur, May 01 (TYO): Anogo ishika jakdang Tuli nung tzümetsüng aser Merangkong nung yipru mopung tesashi agi amokmerena ki aika raksatsüba sülen ano tanep Deobar anepdang 2.00 ako shi nung talisa Langpangkong, Asetkong aser Jangpetkong nung yimtsüng aika nung yipru mopung tesashi agi ki aika raksatsüogo.
Iba osang zülu tashi nung angazükba agi, Langpangkong kübok Akhoya nung ki ajak agi 76 raksa aser item rongnung ki 31 kanga mejungi raksa, Changtongya town nung 71, Chuchuyimlang yimtak ki ajak agi 44, Chuchu town nung 44, Yisemyong nung ki 16, Unger nung ki 76 raksa aser item rongnung mejungi raksabaji ki trok liasü, Kelingmen nung ki 31, Changtongya yimsen nung ki 4, Jakpa nung ki ana den school ki dena raksaba osang liasü. Ano, Mongsenyimti, Chakpa, Salulamang, Longkong, Yaongyimti (Old), Yaongyimti (New) aser Pangsang  nungertem nunga ki kanga mejungi raksaba osangtem liasü saka ki kwi raksaar mejangjatet.
Iba osang zülu tashi nung, Arkakong nungi adokba MLA aser National Highway minister,Wb.Nuklutoshi den Mokokchung district administration purtemi yipru lendong atalokba yimtsüngtem sema oa liasü. Ano AKM aser LKM lenirtemia yipru lendong agi timtem ajuruba tesemtem sendanga liasü.
Ano, Asetkong nunga kasa mapang nung yipru mopung tesashi agi Longjang yimtak Library ki dena ki ajak agi 46 raksatsü, Khanimo nungbo tenla ki dena taliba ki tenet, Longpa nung ki 21, Kubolong nung ki 7, Chami nung ki tenet, Mopungchuket nung ki ter, Süngratsü nung ki 35 aser Yimchalu nung ki ana raksaba osang liasü.
Iba yipru lendong atalokba osang angashili Impur Constituency nungi adokba yimsüsür, Dr.Imtiwapang-i yimtsüng ajak semdanga oa teyari agütsüba osang angazüka kanga pelar ta iba osangzülur den jembidang, Dimapur Asetkong Telongjem Tir, Wb.T.Lanu Imchen-i metetdaktsü.
Ano, kasa anepdang Jangpetkong nunga Khar yimtak ki 121 raksaba osang liasü. Ano, Changki aser Mangkolemba nunga kasa yipru agi kiojen raksatsüba osang angashi saka osang tejangja magitet.
Ano Ongpangkonglena Mangmetong, Chungtia, Kinunger, Longmisa, Küpza, Settsü, Longjongkong tesem balala nung ki aser light post aser BSNL tower raksaba osang liasü.
Yimtsüng kar nungbo ano osang junga magiteti lir. Kiojen raksaba dang masü ano alu, süngdonglidong atemba, tsünüsempongtsü raksaba osang aika alitsü saka item osang tejangjajibo asüngyanü nunger dang metettsü, ta Mangkolemba ADC, Wb. Imtiwapang-i iba osangbener den jembidang ashi.
Ano, kasa yipru mopung tesashi agi Phom lima nunga Longleng len kiojen aika raksatsüba osang angazüker.
Osang tamajung kaji; tesem aika nung yipru ajanga light post raksaja lir aser ibaji yanglutsü atema tajemba agi ita ka shibo agitsü südi, ta paisa metetdaktsü.
Tanep yakta nungi süngdonglidong ajanga lenmang tepdanger aliba tesemtem ajak Road & Bridges department den yaritepa lapokyonga odagi aser tanga maparena akokba tashi inyakdaki, ta iba osangbeneri Mokokchung D.C. Wb.Sushil Kumar Patel (IAS) den jembidang pai metetdaktsü.
Yipru ajanga yindong aika raksaja lir, anungji tesem aika nung light tatsüka marutsü. Iba maparen dak sentakba nung tekaratiba nung yanglutsü asoshi Power department den tim lenmang bushia inyakdaki, anungji, nüburtemi mapang tatsükaji arema atatsü paisa mepishia metetdaktsü.
Lendong atalokba tesemtem semdangtsü asoshi Home Department kübok NSDMA (Kohima) nungia telok ka arua Mokokchung tonga lir ta angazüker.
Iba osang zülu tashi nung item lendong balala ajanga tasü-tama aser yiruyipong atalokba osangbo kecha mangazük.

Taonung, Deobar aonung 10:30 ako shi nung iba osang tezüludak nunga Langpangkonglenbo kasa yipru mopung tesashi aitba osang liasü. “ Tanep 2:00 ako shi nung aitba ama joko ghonda ka shi yipru tesashi aitba manener,” ta Changtongya Town nung alir kati phone nung iba osangzülur den jembidang metetdaktsü.