Ao lima/Nagaland nung Assembly Constituency artsü memelenshitsü atema

To,
          Ao Senso MLA-tem

Subj:       Ao lima/Nagaland nung Assembly Constituency artsü memelenshitsü atema.

Aküm tsübua aliba yimsüsür tajungtem,

Iba zülu ajanga onok tekübüjia aliba nisungtem-i nenok den tebilemba kar lemsateba aser ajungshia yamai zülur.

Indian Constitution Article 370 (3) 3rd. Proviso nung agüja aliba agi, 2026 küm nütsüng yongsük züngdangba (Census) kaket nung madok tashi, Assembly Constituency readjustment masütsü ta agüja lir. Iba Proviso Clause (i) (ii) nung agüja aliba agi, Assembly Constituency-tem artsü yanglushitsüba tenoktangbaji 1971 Census sülen readjustment asüba, aser 1991 Census sülen readjustment asütsü liasüba amaji 2026 Census kaket nung madok tashi Constituencies readjustment masütsü ta tejangja agüja lir.

Constitution (Seventh Amendment) Act, 1956 ajanga Constitution of India, Article 170 nung Legislative Assembly nung member (MLA) ishiba age 60-bo asütsü ba temzüng yanglu. Saka, Constitution (Thirteenth Amendment) Act, 1962 nung, Article 170 nung MLA ishiba agi 60 (roker) ta alibaji Nagaland Legislative Assembly nung MLA 46 (lirterok) tang asütsü ta temzüng yanglu. Representation of the People Act, 1950, Amendment Act 61 of 1968 ajanga Nagaland Legislative Assembly nung MLA 46 (lirterok) ta alibaji MLA 52 (fifty two) ta melentsü. Tesüsa, Delimitation Act, 1972, ajanga Nagaland nung MLA seat 60 (roker) tutsü. Yamaji Assembly Constituency Menden teimba tutsüba ajak nung Assembly Constituency artsü temelenshi (readjustment) liyonga aruogo.

Article 170 3rd. Proviso nung 2026 küm Census kaket madok tashi Assembly Constituency delimitation/readjustment malitsü ta alibaji ajaki metet. Saka, Inter-State mesüra Inter-District mesüra Union Territory artsü kar yanglushiba agi Parliamentary/Assembly Constituency artsü (boundary) dak tangshia (effect) aküm nungbo, Delimitation Commission (Union/State Commission) ajunga tanghsitsüsa akümba Constituency temji kitangar (neighbouring) Constituency tem den readjustment asür. Census nung ajemtakar Constitencytem readjustment asünungbo, nütsüng yongsük aika alitak-itang (Towns and Cities) MP/MLA seat ajak Census adokshia readjustment tenüng amer belenshitsüsa akümtsü. Iba yongji, Article 170 3rd. Proviso nung 2026 sülen Census madok tashi, Assembly Constituency Delimitation/Readjustment masütsü tenoktangba agüja lir.

Nagaland nung inter-district boundary changes ajunga Assembly Constituency artsü dak kongshiba kecha nunga mali. Tongtipangsa, Mokokchung district (Ao-li) nung Assembly Constituency artsü readjustment asütsü kecha temzüng ajanga takhangba mali. Naga nunger kin mesüra nütsüng nübur kar Assembly Constituency tataba (allocation) nung temelong masü lira, Nagaland Legislative Assembly-i telemtetba (resolution) agir, Central Government tangi Assembly Seats tasen meshiloktsüla. Küm 50/60 tashi Assembly Seats agia arur, readjustment tenüng atemer, tanga district-i, Ao-li nung aliba Assembly Seats belentsüba (transfer) telemtetba agiba yabo Constitution Article 170 3rd. Proviso (i) & (ii)-i noktangba aliba (Prohibited) anema inyaba mapa lir. Indian Constitution-i tenoktangba alema Constituency readjustment tenüng atemer, Ao-li nungi Assembly constituency Seat ana tashi tanga limai belentsüba aliba osang angashia, iba temebishiba zülu nenok yimsüsür tajungtem tangi zülur.

Nagaland kecha nunga, tongtipangsa Mokokchung district nung inter-district artsü temelenshi, Assembly Constituency artsü dak tangshia mali. population ajema kümerbo Assembly seat tanga limai belener (transfer) aotsü kecha temzüng agia memelar. Kari Assembly seat tasen aginüra mesüra nungdaka kümra, Government dang mepia meshitsüla, aser nütsüng yongsük renlokba dak ajemdaker, tanga lima nung aliba Assembly Constituency Seat bener aotsü keja Government authority-ia mtongtsüla. Anungji, tekaratiba nung asenok Ao kin nungi MLA-temi-tanga Nagaland Legislative Assembly nung Agenda kar benoka iba o jembitepa Resolution kar agia Central Government dangi abentsüla ta tangatetba nung iba o nenok tangi zülur.

Sd/-

1. Aochuba (Advocate)                               2. Talitsungba Ao (Advocate)
2. N.Y. Themjen Ao (Advocate)                4. Imti Imsong (Advocate)