Ao Musical Revival Album sayaogo

Dimapur, Dec. 05 : Tanü nikongtsütsü 3:00 ako nung Watsü Merenla Chuba-i Ao Musical Revival Kensep Album IMC Hall Dimapur nung sayaogo.
Iba kensep sayatsüba mapang, Ao Musical tayonger tenüng sanga jembi. Lai ashiba agi, Talitemjen Imchen-i züluba kaket kanga jangratema züngshir liasü.
Ano Ao oshi nung ken atener metsürti tashi jateper kensep yanglutetbaji takok tulu aser alima asoshi otsü tasen ka lir ta laisa shisem.
Korea, Japan aser Mizo kentem aseni tetezü memetetaka, asenoki jangrapangraa angaba ama, asen Ao oshi nung ken atenba yaa, asen kin dang angatsüba masü, pi kintemia jangratsüsa tentettsüla ta Wt. Merenla-i ken atenertem ajungshi.
Ano ken angartemia ochishia sen yong alir ka ka asütsüla. Aseni sen yong aliba oset ka, mali ser arentaka amshira, item temenen tera jagi tarutsü nung tuluba akoksar ta kensep sayatsüba mapang ayongzük.
Ao Musical Revival tayonger Talitemjen Imchen-i ashiba agi yashi tashi, Tar Nünger Otsü zülur ka dang liasü, saka Ao kongkikenortem (Musicians) aliba agi tanü nungi, pa ken zülur ka kümogo ta telok dang pelaba metetdaktsü.
Tawa ya India lima nung DVD dak alaka CD mangur. Anungji iba kensep alirtemi raktepa alidaktsüner, mesürapang tesülen alirtemibo DVD dang alitsüsa akümtsü. Music revival tenüng nung jenjang 250/- agi dang ayokba atema, ken atener aser kensep ayokertemi jenjang raksatsür ta mebilemdaktsüner ta shisem.
Mr Imnatoshi Longkümer Asso. Pastor DABA , pai ashiba agi Tali Imchen ya ken meimer tajung ka lir. Ken atener-i masü saka ken meimer, adianu Tali Imchen-i iba album salaba ajanga alima dangi temelenshi tuluka bener arutsüogo. Iba mera tasen ajanga kongkikeno tsütsü tali tajungba renloka aotsü nübur ajak teka amteptsü ayongzük aser shirnokisa iba kensep angadir, ajak temoatsü südakjang ta shisem. Iba sülen kensep aser Ao oshi nung ken atenertem moajaa sarasademer sendong tempang,
Tanü nungi item dokantem nung iba kensep ayoktsü:-
1. Dimapur – (Christian Literature Center Contact No. 03862232604). (Exclusive 4th Mile 03862242153). (Heritage Publishing House – 03862248431),
2. Kohima – (Crossword Contact No. 8014702477. Zenith CD Library Opp. Fera Hotel – 7085994958, 9856249341), (Unique Collection Khedi Market Ground Floor Room No 10 – 9615602712),
3. Mokokchung – (Eastern Book Depot ABAM Contact No. 9862983463).