Ao osang tajung ken kaket nung ken No. 19 nung temelenshitsü kar lir ta ni 30/09/2016 nung ashiba nung Dr. Y. Imti Tsüdir-i 16/10/2016 nü langzüba nung ni ano tera jangjashitsür

– S. Medem Kichu, Lerie Colony, Kohima.

30/09/2016 anogo nung ni asen Ao ken kaket nung ken No.19 nung kensü tera yanglushitsü lir ta ashiba ya ni ABAM kübok ken Revision Committee dang ashiba O ashi, individual kar dang ashiba-a masü, mesüra individual-i langzütsüsa iba o nung points kecha mali.
Ni kü ocet nung ashiba amato, iba ken ya aseni akhi dang atenba kensü nung to masü tera meputepi atener. Saka original kensüji S.S.S. kaket nung lirji (S.S.S. kaküt No. 203(c)) iba kaküt nung reprangshia melenshi nung kanga dang ajungtsü ta tebilemba ka dang agütsü ashi, ni shinga dak tai tongloktsüa mesüra shinga maitsü.
Ano ken no 265 ya-a ni tatishitsü ka nung dang amshi ashi, ni iba atema kensü raksaba, tai zülua aliba, mesüra kar dak tai tonglokja-a ni mezülu. Ni kü ocet nung ashiba ama, ibai 1996 küm ken kaket tasen adokdang kensü tera raksar adok. Saka ano ken Revision Committee-i tanaben iba Edition ya 2002 küm Revised asü aser iba mapang nung iba ken ya shidakba kensü S.S.S kaket nung aliba amaji yonglushir adok aser tanü tashi iba kensü nung atener (S.S.S Kaküt No. 221).
Yamaji iba ken no.19 ya-a tan mapang nung ya yanglushi nung kanga dang ajungtsü ta ashiba dang lir. Kü ocet 30/09/2016 nung adokbaji ano ken jungjunga züngang. Ocet nung kechi shia ali, aji jung junga angateter ang Tasüngdangbaji asüngdangtsüla.
Ni temalen ashiba ama, iba ya individual-i langzütsü nüngdak mali, saka nai langzüadokerji kecha masü. Saka na! iba ya exam mapang ka nung inyakba mapa ka asü nungbo na iba question nungbo mark kecha mangutsü, kechiaser nai question-i meshiba answer masü saka nü mulung nung bilemba answer ang agütsü.
Ano 2002 küm ken no. 265 kensü shidakba nung yanglushiba ya nai maginür amai angateter. Nai yamaji bilema alinunga kanga dang menurang bilemteter südi. Kechiaser iba ya yanglushir joko taküm agi küm 15 buba süia aor aser küm 15 tsüngda nungji nai-a iba ken ya kwiben tener alitsü, süra koda sür tangang iba ya bilemteter.
Kensü raksaba /meputepba ya nai ashir, kensü raksaba masü, ken züluri melenshiba agi ta ashir(ken zülur ta masü ken committee ta ang amshidi kechiaser ken zülurbo shinga taküm mali) parnoki kensüji tera melenshir adokba agi ta ashir saka ken kibur dang masüngdangi kodasür asensasa kensü melenshitsü ? Ibaji copy right ozüng agi memelatsü.
ABAM kübok aliba ken Revision Committee-i-a yamalaji kodanga meinyaktsü, kechiaser asenok dang nungi parnokiang temetetba lir. Kensü raksaba, aibelena zülusema aliba ajak bushiteta akhi amaji shidakba nung yanglushir ayutsü dang ajaki meranger ashi, pei pei mulungba nung melenshia amshir ta asüba ojibo mashir aser memeteter kati jembiba o ang mesük.