Ao Osang tajung ken kaket nung ken no. 239 Yisu tang, ni arur (Jesus I come) iba ken nung temelenshitsü kar bushitetba yangi sayur

– S.Medem Kichu, Lerie Colony, Kohima.

Iba ken nung temelenshitsü aliba ya mapang talangka nungi angur aser iba ya ken Revise asüba mapang nung melenshir adoktsü südi ta bilemba agi odang tokja-a arur, oda tang Revised asüba mapang nung danga yanglushir adoktsü ta bilemer ata nung ano kasa nung dang adokba agi iba ya sayur. Ashiko, 2nd Revision mapang atongtsü ano talangka dang alitsü südi, saka iba copy ya yua atar kodang mapang tongdir mamadoki melenshi nung ajak atema tajung asütsü ta bilemer.
Asenoki iba ken nung, ozü mokomin tia nungi, oh, kibuba ni arudar, ta atener, saka nibo iba ya tera tai nung meyipzük ta bilemer. English O nung yamai zülua lir:- Out of my bondage, sorrow and night Jesus I come, ta zülua lir.
Iba tetezü ya, kü talenba nungi tejashi aser tammang tia nungi, oh! Yisu tang ni nü dangi arur, ta ashiba o lir. Saka asen Ao o nung iba tetezü ya mokokmin agi meyipzüker atener, koba tetezü English nung ashiba ama masü. Ano iba den külemi iba oren tatempang nung oh! Yisu tang ni arudar ta amshitsü melena oh! Kibuba ta ang aseni atener ken title nungbo English aser Ao o anaprongla nung Yisu tang ni arur ta zülua lir, saka koda sür 1st line nungbo Yisu ya Kibuba agi melen?
Ano yimya agi Mokokmin o yabo alima yimya o nung dang amshir ashi, asen temenen tia nungi Tsüngrem dangi aruba o nung mamashir. Item ya pentet-penteta amshitsüla. Talisa tekong kar nung Oh! Kibuba ta, kar nung Yisu ta meyoktepa amshiba jagi iba ken atendang tarendakba agi sünger kodanga jangratema metenteter.
Iba ken ya mesüka ken no. 392 nunga tekong kar nung temeim agi atsüteta ta, kar nung temeim agi anitet ta meyoktepa zülua aliba yagi koba tekong nung atsütet ta zülua ali, koba tekong nung anitet ta zülua ali itemji bushidang kanga dang timatemer aser ken kodanga junga metenteter. Iba indang ya taoba mapang ka nung asen tesayur M.Meren Ex-Pastor, Ungma, paisa yamala ya kanga kümdanga aser pentet-penteta shingaia tarendakba makai atentsüsa inyaktsüla ta ashiba O ka bilemteter. Yamaji item ken ana ya kodanga tekülem mapang nung tendir nisungtem kanga dang timtema aser arentaka atenba angur.
Yamaji asü nung iba ken ya yamai ang yanglushi nung ajak atema tapet aser tesütep asütsü ta amanger.
Temenen-jashi-tammang nungi
Oh! Yisu tang ni arudar;
Ne temeim, sangwa küpoki;
Yisu tang ni arur,
Kü temenen ra kangshi nungi,
Kü sensak nungi nü rongseni;
Kü temenen nungi nü dangi;
Nü dangi ni arur.
Ano 3rd stanza, 2nd line nung Lirepa-tsüka sünepdaki ta zülua aliba tetezü ya tera melenshi nung ajaki mela-mela-a angatettsü ta amanger.