Ao Osep adoktsü,ojangtem tetezü bendentsütsü mepishir

Dimapur, April 11 (TYO): 1911 küm Rev.Dr.Edward Winter Clark-i mezüng Ao osep (Ao Naga Dictionary) adokba nungi tenzüka Ao oshi zülu nung lirotemedemba temedemba ta tajungba küma amshia arudagi aser tang tashi nung Aortem rongnungi lenir Dr.Renthy Keitzari 1999 küm adokba “Ao Dictionary”, ABAM tenüng nung Rev.C.Walu Wallingi 2005 küm adokba ” Ao Osep”, L.Wati Jamiri adokba Aoo Naga Orrlem, Tir Yimyimi 2013 küm adokba “Tetsü Meli” aser Wb.P.Alem Jamir-i 2015 küm adokba “Ao Oshi Ojangrü” kakettem ajanga Ao oshi züluyim nung yariba dang masü saka Ao oshi ojang aser olong tetezü angatetdaktsütsü merangdagi.
Item ajakji Ao oshi tajungba küma ajungkettsüba aser renlokdaktsüba nung shilem agitsü merangba mapatem asütsü. Tanübo joko Ao oshia school nung dang masü saka college aser university nung agir asünungji, Ao oshi züluyim nung liromedemtsübaji kanga rongdak nüngdak kümogo.
Iba nüngdakji reprangteta, Ao Senden Literature Board ajanga “Arok Ao Osep” ka adoktsü asoshi mapa tenzükogo. Iba maparen nung  tongti shilem agirtemji  Prof. (Retd) A.Lanunüngsang,  Ph.D. (Sociology) aser Rev.C.Walu Walling, B.D.M.Th nati anir Dr.T.Temsününgsang, Ph.D  (Linguistic), Dr. Chubatola, Ph.D (English Literature),  Dr.Pangersenla, Ph.D,(Linguistics),  Dr. Imlirenla, Ph.D (Linguistics)  aser Wb.Anungba Sanglir nungertem asütsü.
Parnok den iba osangzüluri jembidang angazükba agi, iba Arok Ao Osep nung Ao olong meyirijang asem shibo alitsü aser olong tetezü shia oren kaka agütsütsü aser English nunga tetezü agütsütsü. Iba jagi Aortem asoshi dang masü saka tangar Ao oshi angazüknertem asoshia teyari angutsü imlar, ta parnokisa ashi.
Iba Arok Ao Osep tajungba aser teperiba nung takok ngua adoktettsü asoshi ABAM Literature Committee den angatettepa inyaktsü aser ano tantsü tambu aser lanur tashitemetettertem rongnung temulungertemi pei metetba mesüra purapitetba Ao olong aser ojang tetezü bendena agütsütsü mepishir ta iba osep kaket adoktsü purtemi mepishia metetdaktsüogo. Talisa, Ao oshi nung küm nung ita ter ana aser hopta nung anogo tenet tenüng agütsüra teyari tuluka asütsü ta parnokisa ashi. Shirnokisa iba osep adokba nung olong aser ojangtem tetezü agüja yariteptetdir, parnok tenüngtem iba kaket nung shisemtsü ta parnokisa metetdaktsü.
Iba osep kaket ya sangküm 2017 küm tetenzüklen renema sayatsü merangtsü, kechiyong Aortem asoshi tang Arok Osep Kaket ka tsükaronga nüngdaker ta parnokisa shisem.