Ao Oshi Jenjang

–  Dr. Asangba Tzudir.

Tanü putu nung asen Aor lanur shirnokisa Ao oshi kanga junga jembiteter, ya asen ojala obala nungeri pei chirnur tila asüdang nungi parnok den mapang peria agüja Ao oshi sayua jembidaktsüba agi ashiba lir, aser Ao oshi jembiba dang masü saka aki otsü aser sobaliba indanga terabo jembir.
Lanurtem (teenager) kodang reprangdir, aikati Ao oshi bo jembir saka arepdaka jembir aser pei sobaliba sübutsü sübuba dak alaka akhi otsüla oboula nunger mapang sobaliba aser otsütem mejembibaji dang masü saka junga memetet.
Ano kodang later millennium tanurtem reprangdir, parnok teimbai Ao aser Nagamese meyokteper jembir aser ano karibo Ao oshiji mejembiteter.
Maneni, ano kodang school tanurtem reprangdangtir parnok kar dak alaka English dang jembir. Ya tsürabur tai asü kechi tai?
Tanü putu technology aser social media-i yimsü asür aser tanur ka o mashidang yongi mobile phone ajanga internet nungi kechisarena aika repranger English oshi nung repranger. Yamaji, parnok schooli ao tenzüker kelenbo kechisarena sayubentsü ajonga English nung sayur. School nungi kidangi arur kelen khen dang lirbo tanurtem tuition agir. Iba sülen mapang tatsüka adokra TV nung English aser Hindi indang cartoon channel reprangtsü.
Tsüraburtem, talisa tanur tetsü tebu kümer saka aiyer-asangur jilo bo meindok alirtem, parnokia Ao oshi agi jembia sayutsübentsü asütsü melena English jiang tesapuba jembir. Pei chirnur-i Ao mashi yonga English jembitetba jiang tangar tsüngdang konang amai bilemer.
Tesüiba putu meyipa reprangdangra ‘A for Apple’ ta school nung angazükba dak alaka apple süngjangjibo mangu aser mechidang. Tanübo, sen dang lira kaket nung azüngba dang masü saka talitsüa angur. ‘Mummy, I want to eat avocado; Daddy, I want to have mixed fruit custard after dinner tonight; Mummy, our school is organizing animation and cosplay programme and I am going to be dressed as spiderman. OH! WOW! That is great, Mummy will buy you the best spiderman costume.’ Aji oda, English oshiji aitsür masü saka jenjang kanga tasak. Takar atemabo kecha masü saka maka-maiter atemabo aiben kibong nung asah agi sensak jaoker.
Tanü putu tasen loktiliba nung oshi, talisa English ji kanga junga ashitsü nüngdak, saka asen Ao oshi bo kechi jenjang nung lir? Alima ajonga nung oshi 7000 shi aliba nungi aika samaa aotsüba lendong nung lir. University of Cambridge nung tezülur Tatsuya Anamoi ashiba agi, Japan nung Ainu oshi jembirji nisüng ter (10) dang anünga lir aser iba oshi samaa aotsubaji anasa nung dang lir. Ano alima ajonga nung senteperbo lisopur (indigenous) nütsüngji 370 million shi lir aser iba putu tatemlen atongdangbo lisopurtem kin balala oshiji 50%-90% samatsü akok ta UNESCO ajanga metetdaktsüogo.
Lisopur oshiji item ya ajanga samaa aor – ali makzükba; tashiyim agi lisopur nütsüng telok balala tesem kar nung anidenba; mangatettep; tzüngsang-mopung melenshiba; alima terenlok aser melenshia ainba ajanga tesem balala nung alir nübur dangai aotsüsa akümba; putu ka nungi tasenba putu dangi oshi mebelenoktsüba ajanga tetsüngta adokba, aser tetsübu aser akmesenba ajanga mejembiba. Ashiba agi, lisopur oshi ya hopta ana nung ka bo sa samar.
Ao oshi-a aroka shisadangra tesama tia ajurutsü tasak masü. Akhi asen otsüla oboula nungeri jembiba Ao oshi den medemdangra tanü asüng jembiba yabo oda Nagamese den sakü ‘bazaar’ oshi amai dang kümer. Putu tensa mapang melenshiba den nüburtem pei yimtsüng doktsür jila balala nung arua alir (urbanisation). Aser kodang yim doktsüdir akhi sobaliba dang masü saka chichiba Ao oshi bo doktsür arur. Asen Aortem Ahom Chuba mapang nungi katitepa aruji asen Ao oshi-oben nunga tsümar oshi bendenloker jembir. ‘Lenmang’ ta masü saka ‘Ali’ leni ken tugotsü ta, mesüra shishilembadak-i aotsü ta melena ‘bazaar-i’ (pojar-i) aotsü ta jembir.
Asen sobaliba aser ayakji pei oshi agi tajungtiba rasah-er (Language is the best expression of culture and identity) aser kodang oshiji sobaliba aser ayak nungi piladir ibaji oshi tesamaba tetenzüker.
Khristan yimsü ajanga aiben asen sobalibaren aser ayak den tatsühtep aser mangatettep adokdaktsür. Khristan yimsü asen limai aruba sülenbo meilong meilongi sobaliba dak aketba oset aika yimtsüng nungia yim kar dak alaka samaogo. Yimtsüng nung aki sobaliba nüngo oset süngkong ama ayuba ajanga akhi sobaliba indang taküm alir aser maneni jembir, aser iba ajanga chichiba Ao oshi taküm lidaktsür.
Tanu Ao oshi atema tebilemtsü tulutibaji Ao oshi kodaser asentenshidaktsütsü? Ao Senden Literature Board (Ao Senden Kaket-keno Zülo Menden) ajanga Ao oshi renlokdaktsüba mapa tajung aika inyakdar. Ao Osep tasenba adokogo, aser shisaliok nunga Graduate aser Masters jenjang nung Ao oshi arangtet tatidang agir aser ano Doctoral jenjang tashi Ao Oshi nung azüngtsü sendong aliba angazükogo. Ano maneni Pentochepchep ritsüng aser Jina Etiben otsü ama tazüngtsü kaket adok nung kanga ajungtsü.
Tanü Ao oshi jenjang asadangra, tejembir tajemba küma odar aser aji kuli aika rongnung tanü alima melenshia ainba den social media ajanga nisung taküm kati nungpoka (invade) aitba ajanga lir. Tanur ka mapang shidak nungi pei kibong atepzüng nung kechisarena sobalibaren aser asen ayak indang sayua tenzükra asen Ao oshiji junga ashitsü. Yamaji, aongnunga aki otsü-oben shia angazükdaktsü nung tarutsü nung Ao oshi agi shisadangren akatsü. Aser tanur ka school-i mao tsüngta itemji mesayura chichihba Ao oshiji bo jungjunga mangazüktettsü.
Tatem nung, tawa Tir yimyim-i ayongzükba lisopur anogomung sentong nung tsürabur kati yamai shia liasü, Ao oshi ji ajaki sapua jembitsü atemaji tamasa Ao oshiji ochi nung yangertsüla. Aji kanga dang shidak lir. Tanü, Aortem rongnung makmakshimak adokdaktsübaji ‘akhi otsü’ tai nung ajemdaka lir aser kodang Ao oshiji shidak masü saka tiyazü ‘otsütem’ ji ang jembidir, aji Ao oshi asoshi kangadang taktsü mapa lir aser Ao oshi jenjang khenyongi ludaktsür. Anungji tiyazü otsü kechisa lir, itemji ochi agi melena Ao oshi nung yangerdaktsü nung dang Ao oshiji tali sapua jembitsü.