Ao oshi nung arangtet tatidang tenzükogo

Arangtet tatidang 2015 agütsürtem.
Arangtet tatidang 2015 agütsürtem.

Dimapur, Oct.21 (TYO): Ao Senden Literature Board (ASLB)-i ajaayanga agiba Arangtet tatidang Bodbar nü nungi tenzükogo. Iba tatidang ya tesem asem nung agir aser itemji Mokokchung, Kohima aser Dimapur alitsü.
Iba tatidang ya graduate aser post graduate jenjang nung agir aser anogo asemnü agitsü.
Taküm küm iba tatidang agütsürtem rongnung Mokokchung nungi nisung 112, Dimapur nungi nisung 31 aser Kohima nungi nisung 11 liasü.
Iba tatidang agütsüdak Kohima nungi osang ka ajanga ashiba agi, iba arangtet tatidang ya Kohima nungbo taküm küm agiba ya mezüngbuba lir. Tanü mezüngnü tatidang agütsüdak tonga aruagi Ao Kaketshir Telongjem Kohima nung ketdangpurtemi semdanga liasü. Parnoki ano tarutsü nunga akok tashi Ao oshi renlokdaktsüba mapatem nung yariteptsü ta shia liasü. Kohima nung taküm küm nungi tenzüka iba arangtet tatidang agiba asoshi parnokisa ASLB dang pelaba metetdaktsü.
Kasa arangtet tatidang Dimapur nunga Dimapur Mission Higher Secondary School nung ASLB tenüng nung Rev. C.Walu Walling ketdangsüba nung agidagi. Tanep iba tatidang metenzükdang Tir Yimyim yimozülur, Wb.K.Temjen Jamiri tatidang agütsürtem ajungshia jembi aser ASLB nung lenirtem dang pelaba metetdaktsü. Paisa sarasadema iba tatidang sentong tenzük.

You must be logged in to post a comment Login