‘Ao Oshi Ojangrü’ – Ao O nung kaket tasen ka adokogo

– Tsüknung Penzü, Dimapur.

1. Aor kaket tasen ka
Kaket tenüng ‘Ao Oshi Ojangru’ ta sür Ao o nung kaket tasen ka, tawa August 28, 2015 nü Dimapur nung sayaogo. Ao Senden Literature Board nung mendenbuba aser Nagaland University nung Pro-Vice Chancellor Prof. Dr. Lanunüngsang-i tesemdanger tongti süa kaketji sayaogo. Iba kaket zülu-sang ya Changtongya nunger Wb. P. Alem Jamir. Iba kaket ya zünga Ao O nung paisa kaket 7 buba zülur. Pa ya tang Dimapur nung Ao Baptist Arogo ka nung Church Secretary mapa inyaker. Pa ya Aor lanur kaket zülur tajung ka. Iba book release sentep (function) nung tesenteper nübo 80 shi liasü.
2. Book review (kaket indang rasaa ashiba)
Kodangsa linük nung kaket tasen ka adokdir, sayadir, iba kaket indang tezülur indang, kaketji kechi onük nung zülu, ajung, majung, itemji olen tatsü agi nisung tain kari osang kaket nung adoktsür. Ano kaket nungji temelenshitsü kar lira book reviewer jagisa ibajia tuteta, yasür melenshitsü asoshi tuyur. Imala mapa dangji book review ta ajar.
Ita shia mesüra ita asem nung (quarterly) ken adokba book review magazine India nung adokba city kar nung book stall nung yokdagi. (nia imala magazine-ji kar aliasa aiben züngogo) ano daily news paper kar nung hopta nung kenü book review tapak balaka mejetteta agütsür.
3. Iba kaket tasen indang book review tatsüka agütsür
Ojang ka dang, saka yangji tetezü aiak lir. imala ojang dangji English agi ‘homonym’ ta ajar. Ao o (Ao+o=Aoo) : Aoo nung ibai ‘Ojangrü’ ta kaket zülusangi meyipzüka yangi amshiba angur. (Iba indang teküpoklen sub-heading no.4 nung ni olen kar shisemba agüja lir). tatishitsü agi (t.a) azü=dog, azü=blood, azü=bend, azü=embrace….ta iba ojang nung tettezü 15 tashi aliba iba kaket nung agüja lir. homonym ojang 625 nung tetezü 2578 tashi pai kanga meranga bendenba yangi sayua lir. ya mapa tulu, tesüngmangtsüka inyaktetogo. Iba onük ya Aor kaket zülur shingaia zülua maru.
Ajisüaka iba kaket tenüng ‘ojangrü’ ta asüba ya meshitak. T.a, nisung tenüng tulu Tongpangkokba ta, Takamanen ta, Yimkongyanger ta, nokinketer nüng kika-süchir nüng, yimsüsür nüng ajatsüba temsüa lir nung, tang jaa aliba tenüng yabo tajung saka yatsürrapur azü süngzü (blood-veins) tajung mesanga aruba dang nungi teküpbokba tenüng-ang ka ajaba mesüka iba kaket tenüng agütsüogo. Ajisüaka, iba kaket nung aketba senti ojang temji anagazüktsü asoshi Aor ajaki iba kaket alia azüngtsü ajungshir.
Ibai ABAM Book Stall, Mokokchung nung, aser Christan literature Centre, Church road, Dimapur nung ta yokdagi
4. Ao osep yangluba nung ya agi kanga yaritsü
Iba ‘homonym’ sayuba kaket ya agi Ao osep (dictionary) yangluba nung kanga yaritsü. Koda yaritsü? Ojang ka nung tetezü balala aket shiaji zülumen (spelling) balala lemsaa yanglutsü. Tang asenoki yamai temalen translator temi yangluba amshi odagi:- Dark = tammang, ammang.
Belief, believe=tamang. Aküm=form, O agi shi aküm (yn. 1:14)
Akhüm = shade, shadow, overshadow; shisakarji linük akhümdong, tsürapurji chirnur akhüm. Item ya tang tamshidak ‘homonym’ lir.
Ano talila aika yangluloktsü asoshi tatishitsü 5 homonym ojang ni yangi agütsür:-
1) TANÜ : tenü = today; danü = cat; taanü = kümbanü, kümba tanü, cotton plantation, daanü= very slow, Alokba inyaksangshi onsara daanü.
2) TENEM : tenem = hill, mountain; denem = hornbill; tennem = 50, fifty.
3) SÜNGKÜM : süngküm = bamboo; süngkhüm = village gate, kotak süngkhüm. Iba
4) ASO : aso = birth; asoo = generation; asü = aon asü (cook curry). ‘aso’ homonym ojang nung tetezü 10 tashi iba kaket nung agüja lir. nübur lokti sentepa külem shisatsü (collective wisdom) agi tanüngba zülumen ji lemsatsülaa. Zülujang tapet mungutet aser tasen yanglutsü makokba tetezü temji odang ‘aso’ ta-jiang ajatsü yutsütsü.
5) Na = you; naa=both, tedi o tenu naa; nah = question, aji shitak nah?
Ao oshi nung aketba homonym ajakbo iba kaket nung mali. Oda noklang shilem nung 70% shi yangi alitsü südi. Ibai aika bendenogo. Tenük sünga tanüngba 30% shi bendentsüji Aor külem wadang südi. Pai lemjem sayuogo.
5. English oshi nung spelling lemsaba otsü.
Alemli England nung jembiba oshiji English dang sürnung tera balaka liasü. Iba dangji Anglo Saxon mesüra Old English ta aja. Yangji homonym onsara aika liasü. Ajisüaka küm noklangzüng 1300…ta tenzükba (14th Century) mapang nung English osep/ dictionary yangludang homonym nung tetezü balalaji zülumen/spelling balala lemsaa yanglu. T.a. ola kasasa mesüra mesüktepa adokba ojang zülumen balala:-
Brace, brass, breast, breeze, freeze, praise, press ta lemsaba.
Melemsatetba homonym temji odang ano homonym jisa maneni amshir. Oxford English dictionary aika nung ojang ka nung tetezü balala aketba homonym ojangtemji serial number 1,2,3,…ta agüja tetezü balala rassa ashiba angutsü.
6. “Ao Oshi Ojangrü” kaket ya tenüng melentsüla
Iba indang olen ka temalen sub-heading no.3 tatemlen shiogo. Iba indang talila yangi rasaa shidi. Iba kaket nung ‘ojangrü’ tetezüji yongrü ka nung ango aika arüba, yongrü den atishia shiogo. Ajia tamajung masü. Saka ano ‘ojangrü’ ta asüba ya English nung ‘etymology’ ta ajaba o tera (root of the word, süngdong tera ta asüba ama; origin of word’ ta asüba nung meyipzüka amshi nung ajiang onsara tapetba.
Tatishitsü ka:- leper tetezü ‘lep’ (coffin) bener aoba rü, lenmang tila ‘lep-rü’ nungi belenzüka ‘leper’ ta jatetba. “Leper nungi sakogo” ta Easter Sunday nung ken ka atenba ya koda temunungratsüka!
Kü suggestion :- English nung ‘etymology’ ta asüba nung ‘ojangrü’ ta meyipzüktsü, aser ‘homonym’ ta asüba ya Aoo nung ‘ojanglang’ ta meyipzük nung-ang tapetba asütsü. Narolang (bunch of flowers), süngkümlang (bundle of bamboos) ta asüba nungi agitetba. Ajisüaka ano kari tali tapetba puratetra aji amshitsü. Iba ama tongtipang onük, ojang nung Aor ajak külem shisatsü (collective wisdom) agi yaritepbajisa tajungba.
7. Tsüngrem aser mojing naa “ojangrü” melentepba
Alemli Dr. Clark putu nung tebang -o jembiba Aoo nungi tezüluba Aoo oshi küma yangludang ( from spoken dialect to written language), Tsüngrem o mojing naa o dera (word root) ji paitepa, melentepa (exchanging) amshiba puteter. Aji yamai:-
Asen limai ano Khristan yimsü marudang, ano alimaji temenen tanela agi sünga alidang, lenmang nung, arem nung aser yimdak yimdong nung aiben temenen tanelai nisung mesüka kümer meimchir dang sayu, imalaji angudang tetsür-tanürtembo taoksa, tetsübo agi jena ao, karbo shirang menaa asü. Ajisüaka tebur nokinketer temi imalaji angudang temenen tanela asü, shitakba nisung-ar aji metettsü asoshi pa, la tetsüngji lua reprang. Nisungbo ali nung tetsüng ajemdaka jajar, nokdaker. Saka temenen tanelajibo ali nung tetsüng ajemdaka mangur. Oda ali nungi inch ishika atur tazüngla nung jajar amai tetsüng temopuji mangur. Tetsüng tetsünglen (bottom portion of feet) mangu nungji oda tanela tetsüngji ali nung arem amai o tatsüba agi temenen tanela dangji ‘Tsüngrem’ ta aja. Tetezü tetsüng ali nung aremba amai.
Ao oshi ya tezüluba oshi (written language) küma yangludang, temenen tanela tetsüng remer senzür amai angurtem to-ang tematiba kotak Tsüngrem, Yihova küma meyipzük. Aser Aor kotaker Tsüngrem Moyotsüngba to agiang Moyotsüng nungi ola-osü tera belenzüka ‘mojing’ ta meyipzük. O dera (root) melentepba asübaji ibaji.
Saka aji tanü meyipshia yangludi ta ashirba masü ako. Tatishitsü otsü bena arua ashirba dang. Homonym = ojanglang ta, aser, etymology = ojangrü ta meyipa yangludi. (homonym = ojangrü ta masüi).
Ali temo aketba arem min tasen alusüa, yapoka alu ludi achi nung tsük aika aruba ama, iba kaket onük tasen agi nübur kanga ajangzüktsü.