Ao oshi renloktsü atema reju balaka nüngdaker

Dimapur, August 09 (TYO) : Tang Ao Senden Literature Board-i Ao oshi wazüka ayutsü aser renlokdaktsütsü asoshi inyakba ya takok tulu lir saka ano tang dang nungi tesademba inyaka aotsü atema oshioben bushiba aser sayuba reju kanga nüngdaker, ta tanü Hokolbar nü Dimapur nung Alima Lisopur Anogomong amongba sentong nung jembidang, ABAM nung taoba Literature & Education tezülur aser tawa ASLB-i adokba Arok Osep yimotir, Rev. C. Walu Wallingi metetdaktsü.
“Iba reju dangji Jungliyimti Academy ta ajatsüa akok, ibaji mapa kümteta inyaka otetra lanurtem aika atema pei oshi nung shisaliok tarokba bushia Ph.D aser post Ph.D degree dena bushiloka aotsü kishi tuluba lapoka otettsü,” ta paisa ashi.
Yashi Ao oshi renlokba agi Aor longjemdaktsü, iba mapang oshi renlokba maparen nung senchimenchi, nashi ak achiba otsü kecha mali asü ta Rev. C.Waluisa “Yashi, tanü aser asüng Ao oshi jenjang” ta asüba onük nung shisalemsatepba mapang shisema liasü.
Tang ya Nagaland nung government-i temelaba agütsür kaketreju nung sayuba Naga nunger oshi 18 lir aser item oshitemji class 8 tashi Naga nunger lipok aser senmang otsütem pei oshi nung azünger, ta School Education department nung Language Officer Wb.Takowatii kasa sentong nung ” Nagaland Kaketreju nung Naga nunger aser Ao oshi jenjang” onük nung jembidang metetdaktsü.
Paisa ashiba, tang tashi nung Naga nunger oshi ajak rongnung Univeristy nung Doctorate tashi agitettsüsa tongtetbajibo Tenyidie oshi dang lir.
“Kokra asen oshi nung Jungli. Mongsen, Changki aser Nokpu oshitem tera balala jembiba ya tongtibang ojangtembo arok oshi küma amshitsü junger,” ta Wb.Takowatiisa metetdaktsü.
Paisa Ao oshi tali tajungba nung renloka aotsü asoshi ASLB aser School Education department nung Ao Language section kanga junga amalitepa inyaka aotsü nüngdaker ta shisem.
Tanü kasa sentong nung ASLB tezülur Wb.I.Temjen Tzüdiri Ao oshi renlokdaktsüba mapa indang ashidang, tang tashi nung Ao oshi ya Fazl Ali College nung agidagi aser ano Nagaland University-i Ao oshi nung Honours course agitsü melaogo aser joko MA tashi agitsüsa inyaktepdagi ta metetdaktsü,
Tanü iba sentong nung adenertem rongnung o lemtepba mapang agidang, Ao oshi sapua aser nümadanga jembitsü asoshi Ao oshi jembirtem kinji ochishir kin asütsüla ta shisema liasü.
Oshi ya ajaki sadema jembitsü aser zülutsüsa meindaktsüra, kaket züluyonga kaketnang nung ayutsüsa dang akümtsü aser aikati angazüktsü mejangratsü ta shisalemsatep.
Ano, tadenertem rongnungsa akhidang ama masü, tanü ABAM Literature Board tashi maitba indang lemsatep aser Ao oshi asentenshitsü asoshi mapang shia Ao Senden aser AKM teloktemi lanur aser kaketshirtem den sentong tapu balala ayonga among nung ajungtsü ta tereprangtetbatem shisalemsatepa liasü.
Tanü iba sentong nung Ao Senso Telongjem Dimapur tir Wb. L.Wati Jamiri tajungshi o jembi aser Tir Yimyim yimozülur Wb.K.Temjen Jamiri anogomong ratet shia liasü. Iba sentong nungsa Abiogenesis telok aser Wb. I.Anungba Sanglir nungertemi ken agi lisopurtem mulung ayongzüka liasü.
Iba sentong nung o lemtepba mapang, Dimapur Ao Baptist Arogo nung sannüker Wb.Toshi Longkümer onir liasü aser Tir Yimyim yimozülur yarir Wb.Tinujungshi Tzüdir menden liasü. Iba sentong ya Rev.L.Kari Longchari lai zünga sarasademer tenzük.