AO OSHI SAMADAR…..MOLUNGDANGTSÜ

– Yangpeluin Pongen,
Yimyu Ward, Mokokchung

Aor aser Naga nunger asoshi Khristmas, New year aser Centenary, ibala sentong ya kanga sapua pelatepa amonger, aji shitak bendanga agüja amongtsüla. Ajioda libaliroa lia arudang/aodang putu shia temelenshi jendi ajurua/lia aruba ama tanü putu nung jala jabasotem to pei tsürabur den külemi alitsüsa mesüi pei pei talidak balala nung kibong küma lia aor aser arur, yamaji lia arudang/aodang küm shia Khristmas aser new year ibala ama mamatetba benjungmong tulu nung amongtsü nür jala jabasotem to pei akaba rongsen, achi-ajemtsü aser sübosolemtsü tabensa aser tajungtiba bener pei chirnur to anir otsüla oboula nunger ki bushia arutsü ta angashia pelaseta pei akaba tajungtiba agi renemer atar. Kodang tsürabur ki to atong, tetsü o tebou na to kanga pelar aser semchirtem toa yamaji pela-a ajurutepa o to jembia tenzük, saka tetsü o tebou nati jembiba o to semchirtemi mangateter aser semchirtemi jembiba o to tetsü o tebou nati mangateter ta akümer. Küm tetenzük nungi tatembangba December ita mezüng hopta tashi pelateba renemba jangratemtsüka sentsüwangshi tesangwa batikato “TAMANG” rongnunga tamangtiba amang agi nempangadok. Khristmas aser New Year benjung tepiyong tetsü o tebou na ki takdang ka nung süitemdaktsür, ajioda benjung temer pei talidaki meyipa aoba asenoki angur. Aji tanurtem tai masü tsürabur tai ta angateter aser Ao o oshi toa tsüraburtemi samadaktsür. Tetsü o tebu natibo ozü tanurtemi bendanger oshi aika shia lir ta bilemogo südi, atangji shitak saka pei tetsü oshi memetetba jagi tongtipang tongtiret sükdang mesüra kodangadokba mesüka aküm. Iba jagi la/pa oshi aika metetba to amajok amai kümdaktsü, item ajakji tsürabur tai ta angatetdi. Khristmas aser New year tobo tempangogo, meyipa marutsü, joko küm tasen atema dang arutsü.
Temeimtsüka semchirtem aser tetsü o tebou na küm tepiyong pelaseta renemba tepela aser tesangwa ajak ali telong nung rempanga ayu ama aküm. Tsüraburtemi pei tetsü tasola o mesayutetba/mangazükdaktsüba ajanga yamaji ataloker aser ataloktsü.