Ao oshi tesamar !

Tanü putu nung Ao oshi ya tesamaleni aor, anungji kümzüktsüla ta Ao kin aser oshi meimertemi kanga shisabolua jembir. Iba olaji angashir yimbazüa yutsütsüla masü saka shitakba asen oshi samadar na (?) ta bilemdanga asadangtsüba mapangji tang lir. Alima nung alir nübortemi jembiba oshi balala indang jenjang shisadangertemi ashiba agi, kodang kin ka nung lanurtemi pei tetsü oshi sapua mejembilir, iba oshiji samatsü tetenzüker. Ano, kodang lanurtemi pei tetsü oshibo jembir saka tezülubo pi bendanger oshi nung dang zülur ta südir, iba oshijibo memenui tesamatsübasa ta  sayur. Ano, kodang pei tetsü oshiji taintemi dang jembir aser junga mezülutetter ta kümdir, iba oshijia tesamaleni aor ta züngshir. Ano kodang tanurtemi pei kidang aser school nung pei oshi mejembilir, ibajibo joko oshi samaogo ta asütsüba jenjang nung iadokogo. Anungji, iba ama jenjang ka nung alidang pei tetsü oshiji mesamadaktsüi kümzüktsüsa arrsangokja inyaktsüla. Tang UNESCO ajanga alima nung oshi tapu balala jenjang aser tia indang bushidangba ajanga metetba agi, alima nung oshi 2,473 dak tali tesamaleni odagi aser India nunga oshi 196 dak tali samatsüba tia nung lir. Item tesamar aliba oshitem rongnung asen Ao oshi ya koba jenjang nung lir ta asenoki bilemdangra, atangji Ao oshi samatsü tenzükogo ta reprangtettsü. Talisa asen limai kaketshisatsü bener arudang asen oshi sapua jembitsü ajungshitsü melen English dang jembitsü ajungshiba agi, joko kaketshirtem rongnung pei tetsü oshi jembitsübo nümamedangteti kümogo. Iba tensa tia ya metet nungbo English nungertemi asenok kanga menütsütsü. Tanü lima yabo yashi lima dang nungi kenyongi balaka kümogo, anungji English yabo school nung mesayuyonga pei tetsü oshi ama shiadoker alir, anungji meyiper shitakba pei tetsü oshiang kidang aser school nung angazüktsüsa akümer. Ano, asenoki angatettsüba kaji, oshi yabo nisungi purapitetba mesüra yangluba ka masü saka Tsüngremi agütsüba ain o lir. Anungji,kodang pei tetsü oshi samadaktsüdir, iba melenji oshi tasen ka meyanglutettsü mesüra bushiaka mangutsü. Tapayutsüka, tanü alima nung oshi 200 dak tali samaogo. Itemji joko tanaben meyipa mangutsü aser mejembitsü. Aji oda, oshi yabo asen oshi dang masü saka alima nung tangar kintemi jembiba oshi kata mesamadaktsünüi kanga apayua bilemer. Iba ama tensa ka nung, asenok Aortem rongnunga Jungli aser Mongsen dang masü saka yimtsüng shia nung jembiba oshi balala aser osü dena mesamadaktsüi jembitsü aser zülutsü ajungshiteptsüla. Asenoki asen oshi nung oja aser oba ta ajatsü amadokra, ibai ozü lima, ozü yimkong ta jembitsü amadokra, asenok dak nungi oshi dang masü saka nüchi shisatsü ka samar asütsü. Aji oda, pei oshi amadokba nisungi, pa mesüra laji tazüngba jenjang tulu teploka liaka, pei lima aser pei nübortem metenzüktettsü.