Ao sayutsüba mapang

Nisung shia pei tenüng ali ama, kin shia pei oshi ya pei tenüng amai lir, anungji pei tetsü oshi mesamadaktsüi wazüka ayubaji pei tenüng memenendaktsüi wazüka ayuba amai lir. Naga nungertem rongnung English nung zülutsü, azüngtsü aser jembitsüba ya Aortemi tama angazüker asütsü, anungji Aortem kari English jembi ashibaji British aser America nunger aküm ama tenükshitsüka liasü südi. Aji oda, English agi zülutsü, azüngtsü aser jembi ashirtemji tashitemetetertem liasü. Iba amaji pei tetsü oshi dang nungibo bendanger oshi süaka English jembibajiang aküm taketba aser tajungba amai bilem nungji, tamalen pur lenirtem kibong aika nung tsüraburtemi tanurtem dang kidanga English oshi nung dang jembitsü ajungshi, anungji item kibong nung intettertem tanurtemi pei tetsü oshi mejembiteti aküm. Iba sülen, talisa Dimapur aser Kohima ama town nung alir kibongtem nung Nagamese oshi ya kanga bolua jembitsü tenzük. Idangji, tsüraburtemi pei tetsü oshi dena jembitsü ajungshia len shitak mesayutet nungji, tanübo arishi küm 30 teküpboklen pur tanurtem aikati Ao oshi mejembitet kümogo. Ibaji Ao oshi samatsü tenzükba tamaitsü ka asütsü. Item tanurtem jagi pei yim tenüng meshitetter aser pei kidong memetet kümogo. Anungji, parnok atemajibo Ao aser Aor ta asübaji bendanger amai ka dang kümadokogo. Tanü iba tebilemtsüji reprangteta asenoki asen tanurtem dang Ao oshi sayutsü metenzükra, ashiko, 2100 küm tashi nungbo Aor jembir yimtak yimtsüng nung noklang ishika dang anüngtsüa akok. Kasaji Latin America nunga küm ishika jakdang Spain nunger oshi ama, bendanger oshiang sapua jembiba ajanga parnok kin aika pei tetsü oshi, tapayutsüka tejembir kata mali, samaogo. Atangji, asenok asoshibo asen tetsü oshi asentenshia arudaktsütsübaji temenu mali, tang ya mapang shitak lir. Ano, asenok tia ajung, tanü putu ya alima ajunga nung lisopurtem pei sobaliba, pei oshi aser pei temeten bushiba mapang lir. Tanübo joko English jembitetbaji kecha balaka masü kümogo, anungji pei tetsü oshi mejembitetbajiang tangar tsüngdang aser pei asoshia tamakok aser maksü ama ka kümadokogo. Asenok ya oagi England aser America nung English jembia senzübaji parnok asoshi kecha balaka merataket mapa ka masütsü saka asenoki parnok dang asen oshi aser asen sobaliba sayutetra, ibajiang parnok tsüngdanga asenokji tashitemetetter asütsü. Ano, asen tetsü oshi mejembitet sür zülu nunga mamshitetba Nagamese ama oshi ka jembiba nungji tamakok aika lir. Atangji, Nagamese ama oshi ka ashibajia junger, saka Nagamese ashiba agi pei tetsü oshi mejembitet kümra, ibajibo peisasa tagidak makaba nisung ka küma aor asütsü. Item ajakji kodang asenoki bilemdangdir, talisa town-tem nung Nagamese aser English jembiba ya menokdangtettsü, kechiyong tangar kintem den jembitsü asoshi item oshitem ya kanga nüngdaker. Anungji, item oshitem denji külemi dang asenoki Ao oshi jembi angazükdaktsütsü asoshi lenmang kar bushitsü nüngdaker. Item lenmangtem rongnung mezüngbubaji, akok tashi kidang tsüraburtemi anir kinungertem rongnung Ao oshi agi dang jembitsüla. Tanabuba nung, town-tem nung Ao sayuba skul mesüra class lapoktsü. Iba Ao sayuba class-ji town-tem nung Sunday School mapang minute 20 shi agiteta Ao tesayur kati sayu nunga koma süla ta asenoki taoba hopta nung bilemdangogo. Atangji, Suunday school ya oshi sayuba skul masü saka Tsüngrem o sayuba skul lir. Ajisüaka, asenoki Sunday skul ya akok tashi Ao oshi nung agira aser mapang tatsüka Ao oshi sayutsü asoshi anünga yutsüra, Tsüngrem o ji pei oshi nung angazüktsü aser sarasadema pei tetsü oshi nung sarasademtettsü. Tapu tapu asüyonga tsüraburtem dang pei tetsü oshi agi oja, oba mesüra ala, aba ta ajabajisa tajungba aser temulungjang nung tedangshiba. Iba amaji pei tetsü oshi agi Tsüngrem dang Aba, oba ta jaa sarasademtsüba jagi shitakba pei tebu amai bilema sensaksemba mulungsentsü ka arur. Iba tangatetba nung asenokbo Ao sayutsü aser kanga sapua jembi tenzükdi.