Ao Senden-i Municipal Act magizüker

Dimapur, August 17 (TYO) : State cabinet-i Urban Local Bodies/Town Councils nung tetsür nem 33% agütsütsü indang telemtetba agiba magizüker, ta Ao Senden-i sangdong ka nung metetdaktsü.
State sorkari Nagaland nung Municipal Act tenzüktsü atema mezüng benokdang, Land & House tax ji Aortemi magizüker, anungji iba Act mapa küma meinyakdatsütsü ta Ao Senden-i noktak, ta sangdong nung shia lir.
Ajisüaka, sorkari Urban Local Bodies/Town Councils nung tetsür nem 33 % densema tanaben Act benoktsü merang saka iba onük ya Ao Senden-i Aor alidak metenzükdaktsütsü ta noktanga lir.
Indian Parliament-i Act ano magizüki lir saka State sorkari iba Act tenzüktsü aritepba angudang Ao Senden kanga süngmanger aser ano iba ya Linük temzüng Arla 371 (A) dena meputep lir, ta Ao Senden-isa ashi.
Aor sobaliba nung tebur-tetsür telemsa mali aser asen state sorkari tetsürtem ‘2nd class status’ ajemzüka yokba nung Ao tsürtema adentsü merangba angudang kanga sasa bilemtsür, ta sangdong nungsa metetdaktsü.
Anungji, Municipal Act nungi ashishitep aketba onük magien tashi aser onoki akhangba atema telangzüba magütsü tashi Ao Senden-i tang-a aser tesü-a Aor alidak iba Act mebenokdaktsütsü, ta Ao Senden sangdong nungsa metetdaktsü.