Ao Senden JCC-i ano maneni Mokokchung mokdangtsü

Mokokchung town nung Brehostibar nü mokdangba mapang agiba noksa ka yangi angur.

Mokokchung, Feb 16 (TYO): Feb 13, 2017 nungi tenzüka tanü agi joko anogo pezünübuba Nagaland tesem balala den külemi Aor litsü nunga anepdang 9:00 ako nungi nikongdang 3:00 ako tashi mokdangba sentong lendong kecha mataloki tipdema tembangogo.
Tanü iba mokdang sentong nung Ao Senden kübok aliba telen balala den ano Mokokchung town nung aliba tanga kin tetsür densema telok balala nungi volunteer-tem arua shilem agia liasü.
NTAC aser JCC nungi teteyuba tasen ka maru tashi iba mokdangba ya manentsü aser Feb 17 nüa akhi ama kasa anepdang 9:00 nungi nikongdang 3:00 ako tashi alitsü, ta Ao Senden JCC-i telemtetba agiogo.
Tanep Mokokchung town Pastor-tem telungjemi Mokokchung police point nung Nagaland tensa tia atema sarasadem sentong tajung ka anepdang 6:00-7:00 tashi ayongzüka liasü. Iba sentong nung Arogo 21 nungi Arogo tenzüker aser amangbapur aika arua sarasadem nung shilem agia liasü.
Tanü Ao Senden ketdangsertemi Mangkolemba, Tzürangkong, Tuli, Tzüdikong aser Changtongya area tem semdanga jajaogo.