Ao Senden kilem tasenba lapokogo

Mokokchung, July 4 (TYO): Minister of Forest, Environment & Climate Change, Wb. Imkong L Imcheni Mungulbarnü Ao Senden kilem ki tasenba meraketa lapoktsüogo. Mokokchung Town Baptist Arogo Pastor, Rev. Ponen Longchar ajanga iba ki tasenba meshiteta sarasademtsü.
Tanü iba sentong nung tongti tesemdanger Imkong L Imcheni jembidang, iba ki ya Naga nunger aser Aor yimli yangerdak, ochi jembidak aser nükla tajung yur inyakba ki ka südaktsütsü asoshi pai ayongzüka liasü.
Lungjemba nung tashi lir aser lungjemer inyakba nung keno makoktsü mali, tashishitep lira tebilemba metongtettsü, anungji, amalitepa kati ka dang taoba ta putepa alitsü asoshi paisa Ao kin lungjema lidaktsünüba o ka ashi.
Tsüngremi Ao kin kanga meim, iyongji asenok nem tesangwa agütsü, tangar dang nungi alia meimba agi tanü Ao kin mezüngpur kümtsü, anungji, item temoatsütemji mamadoktsüla, ta paisa ashi.
Paisa tekümdangtsü o ka ashidang, yimden telok (political party) yabo khen atema dang, saka Ao kinji teti alitsüla, anungji, iba tentet nung party politics khenyongi maitdaktsüi kin ajungtsü atema dang bilema ajaki inyaktsüla, ta paisa shisem.
Ao kin dang temeim sayua iba ki asütsü asoshi kimung tenlar Mokokchung nunger Kichu kidong danga pelaba paisa lemsatep.
Iba sentong nung Ao Senden tir Wb. Imliyanger Jamir, Nagaland Addl. Chief Secretary Wb. Temjen Toy IAS, Mokokchung ADC Sachin Jaswal IAS, taoba Ao Senden tir Wb. Imolemba Jamir, Sangtemla Ward Chairman Wb. I. Tali Longkumer aser Kichu Kidong Mokokchung yim nungi tsürabur kati tepela o balala bener arua tesentepertem den lemsatep.