Ao Senden Literature Board (ASLB) indang rajem O tatsüka

– Rev. S. Temjen Longkumer, Chumukedima.

Metetnüa alidang ASLB ketdangsertem nungi May 18, 2019 anogo nung Tir Yimyim ajanga ASLB nüngja indang koda masüba olen kar rateta metetdaktsüba atema pelaba tamasa shisemer.
English O ‘Literature’ ta ajaba ya Ao O nung kechi ajatsü ta asen Aoer tashi-temetetertemi aser talisa literature nung temulung agütsürtemi akhidang mapang agia shisadang aser jembitepa arur kelen ‘kaket-keno’ ta amshibaji tapetba asütsü ta bushitet aser iba nüngja ya küm aika amshia arudagi. Oda ni anagshir kelen nüngia süng, küm 50 shi arur. Tamalen ABAM nunga Seminar aser Conference ama nung literature den sendaktepa onük jembidang Kaket-Keno ta dang amshia aru (Impur nung ABAM Library nung manuscripts karbo angutsü südi).
Ano Ao Literature Committee (Secular) nung ‘Ao Kaket Ken-Oshi Rogo’ (AKKOR) ta meyipzüka küm aika amshia aruogo (Mokokchung Town mi agi arungdang AKKOR Office-a rongdoker asütsü südi).
Tang idaki shinüba Oji ya, tanü asenoki Ao O tasen bushitsü meranger süra, akhidang nungi Ao O tapet, tajung bushiteta amshia aruba kechiba endoktsü mesüra koda ser amadoktsü? Anungji Ao Senden Literature Board (ASLB) melena Ao O temeja amshidi süra, Ao Senden Kaket-keno Luden (ASKKL), mesüra Ao Senden Kaket Ken-Oshir Rogo (ASKKOR), ana rongnung ka amshi nung aji ang tapetba asütsü südi ta shidanger/bilemer.
Iba tebilemba ya osang kaket ajanga asen Aoer ajak den lemsateper. Saka tongtibangsa Ao Senden Literature Board (ASLB) membertemi ya arok-aroka bilemdang daktsünüa zülur.