Ao Senden mendenpurtem ajak anen

Mkg. Nov. 14 (TYO) : Taoba hopta nung Ao Senden tir Wb.Imolemba Jamir, tongti zülur Wb.S.Panger Ao, tongti zülur yariba Wb. Limasashi aser senotsü ketdangser Wb. Alem Longchar nungertemi Ao Senden tenzüka aliba menden nungi anenba shidi agütsüba den külemi ano tamalen Ao Senden tadong tir Wb.O.Shilu Jamir-ia menden toktsüba shidi agüja aliba onük tanü Hombar nü Ao Senden Federal Assembly nung benoka jembir, parnok ajak teloki menden nungi anentsüogo.
Ao Senden mendenpurtem ajak anen nungji, temzüng nung ajemdaker parnok melena Ao Senden mendenpurtem meshim tashi Ao Senden mapatem repranga inyaktsü atema Ongpangkong Mungdang nung mendenbuba Wb. Angang Jamir tir asütsü aser Langpangkong Tzükong Mungdang tir Wb.L.Tally Longkumer tongti zülur asütsü shimtetogo. Tenati anogo trok tsüngda tanü anener Ao Senden mendenpurtem nungi mapa agizüka bener aotsü teloki nungloktsüogo.
Ano, tanü Ao Senden Federal Assembly nungsa Naga Hoho nung tir menden nungi Aor chanu Wb.P.Chuba Ozüküm tang tashi mena alibaji anogo tenet tsüngda Naga Hoho tir mendenji toktsütsüla ta telemtetba ka agiogo.
Ao Senden mendenpurtem ajak peisasa anentsüsa akümba ya, Nagaland government-i Rongmei kin nem ‘Tribe’ jenjang agütsüba dak aketba ken o nung Ao Senden Naga Hoho nungi atsüngina atatsü telemtetba agiba nungi adokba liasü.
Tang khen atema shima aliba tir aser tongti zülur nati tekaratiba nung Presidential Council aser Federal Assembly senden ayongzüka tang anünga yutsüba kümsük küm tashi inyaktsü atema mendenburtem shimtsü merangtsü ta parnokisa metetdaktsü.