Ao Senden, NTC & CNTC anema prokshiba osang aitsür

Dimapur, July 30 (TYO) :  Internet ajanga ‘social media’ amshirtemi Nagaland nung NTC aser CNTC tentetba mapatem aitsüba aser Ao Senden tiluja osang prokshibaji aitsür, aser item ama lokti mezüngmeshia inyakertemji tatem tashi bushitsü, ta külem sangdong ka nung Ao Senso Telongjem Dimapur (ASTD), Kohima Aor Telongjem (KAT), Ao Senso Telongjem Chumukedima (ASTC), Ao Union Medziphema (AUM) nungertemi metetdaktsüogo.
Iba ama lokti tentetba kuli aser nüngdak memeteti nisung shingaia nübortem nem  tai tangatetba agütsütsü memerangtsüla, iba ama lokti anema tiyazü osang prokshia nübortem mashileni anitsü merangertem anemaji temerenshi tulu alitsü, ta yimten pezüisa metetdaktsü.
Tarutsü nung nisung kar mulungjang nung mangatetba aser jangjashinüba kar danga lira, Aor lokti telongjemtem bushia arua jangjashiteptsüla. Iba amaji mesüi lokti tentet ka mezüngmeshia yimjak nung inyakra temerenshi tulu alitsü, ta yimten pezüisa metetdaktsü.