Mokokchung, Jan 6 (TYO): Ao Sendeni telemtetba ama Jan 3 nungi tenzüka tanü agi anogo pezünübuba Mokokchung nung Municipal Council election atema candidate shinga nomination file mesüdaktsüi nokdanga arudaki.
Tanüa Ao Senden ketdangsürtemi anir Likapur den All Ward Union Mokokchung Town (AWUMT) lenirtem aser ano Ao Kaketshir Mungdang (AKM) nungi meyongertem aika adenshia Mokokchung Deputy Commissioner office kilem nung duty tesashiba nung nokdanga liasü.
Ao litsü aser Nagaland jila balala nung Aor/Aotsür shirnokisa Ao Senden telemtetba anema tashi mangai nomination file süogo, parnoki withdraw mesüra Ao senso nungi jentoktsü, ta renemeba ama tanü Jan 6, 2017 nü ano Ao Sendeni akangakanga renemshiogo.
Municipal aser town council nung tenüng agütsürtem asoshi withdrawal anogoji Jan 17, 2017 tashi lir, anungji, Ao Senden telemtetba anema nomination file asürtemji iba sülenjiang “action” agitsü, ta Ao Senden tir menden bena alisang Wb. C. Angang Jamiri osangbenertem den jembidang metetdaktsü.
Municipal election-ji Aori maginür masü, saka municipal Act nungji Aor sobaliba dak mapetba onük kar densema alinung, item onüktemji meyanglushi tashi municipal aser town council election-ji magidaktsütsü koba Ao Sendeni taoba mapang lemteta lir, iba nungji masetshir, ta C. Angangisa ashi.
Tanü Mokokchung Deputy Commissioner-i GB, ward ajak nungi chairman aser political party balala nungi tirtem telungjem senden ka amentsü atema Dobashi Court nung jaok saka iba senden nungji shinga maru.
Tanüji Mokokchung D.C office nung mapa inyaker staff-tem dak alaka volunteers-temi public shinga D.C office-i maitdaktsüi nokdanga liasü.
Jan 7 Honibarnü nomination file asüba anogo tembanger asünung, taoba anogotem dang nungi tali tashi taitba nung nokdangtsü, ta osang ajanga angazüker.
You must be logged in to post a comment Login