Ao Senden & Watsu Mungdang-i CNSA nungittsü

Mokokchung, July 22 (TYO): Central Nagaland Students’ Association (CNSA)-i tanü agi anogo asemnübuba official tour senzüba mapang tanü Mokokchung, Metsupen Conference Hall nung Ao kin lokti tentet tuba den senden menogo.
CNSA lenirtem den All Sumi Students’ Union (SKK) lenirtem aser Lotha Students’ Union ketdangsertm Ao Senden (Ao Hoho) aser Watsü Mungdang den senden agi.
Lotha aser Sumi kin tentet tulutem ama Ao kinia Central Nagaland Students’ Association (CNSA) mapatong nung akokba tashi agi nungittsü, ta shiogo.
Ao Senden lenirtemi, tebudi ka ama Senden-i kaketshir tentet CNSA nungtita yaritsü, ta ashi.
Senden nung CNSA Tir Charles Lotha-i CNSA indang nükjidongtem aser mapatongtem indang rasa-a ashi aser kin asem- Sumi, Lotha aser Aortem nem temulung ajunga agi nungitdaktsüner, ta mepishi.
Paisa, CNSA-i Nagaland ajunga nung Disturbed Area Act, foothill road, arrtsü ken o aser Tuli Pulp & Paper Mill onük densema tongtibang onüktem atema inyakysü, ta metetdaktsü.
Iba dak sentakba nung Ao Senden ketdangsertemi CNSA-i ochi asoshi raraba nung yaritsü ta ashiba den külemi CNSA ketdangsertem dang item onük asoshi inyakdang Naga nunger rangben ajungtsü temulung nung yur kanga züngzünga inyaktsüla, ta tekümdangtsü olen lemsatep.
Ao Senden-isa CNSA dang Lumami nung aliba Nagaland University Headquarters terenlok asoshi, Doyang Hydro Electric project aser Tuli Paper Mill densema tanga onüktem asoshi inyakdaktsüner, ta ashi.
Maneni Watsü Mungdang lenirtemi CNSA dang mapa tajung maneni tasü itta inyaktsü ajungshi.
Iba senden tembangba sülen CNSA lenirtemi Yajang yimtsüng semdang aser yimdaklirtem den arrtsülen aliba security sepaitem dena ajurutepa sensaksem.