Ao Sendeni Arok Osep adoka sayaogo

Dimapur, March 09 (TYO) : Ao Senden Literature Board (ASLB)-i mezüng adokba Ao osep (dictionary) tuluka tanü Dimapur nung Aor tongtibang lokti tentettem nungi lenirtem sendena lia Nagaland Chief secretary, Wb.Temjen Toy-i sayatsüogo.
Iba osep dang ya Arok Osep ta ajar aser iba osep nung tongti ojang meyirijang tenet dak tali lir aser tajung kaji ojang shiaji english oshi nunga tetezü agüja lir.
Tanü iba Arok Osep sayaja jembiba mapang, “kin ka sobaliba teraji oshi lir. Sobalibaji oshi aser oshiji sobaliba, anungji pei tetsü oshi wazüka ayutsübaji kanga tenüngdaktsü,” ta Wb.Temjen Toy-i metetdaktsü.
Iba ama oshi wazüka renloka aotsü atema ano o tasen purapitettsü aser mejembii sendoka aliba o tejentem bendena lanurtemi saputsüsa osep adokyonga aotsü paisa ajungshi.
Oshioben sademsadema renloka otettsüsa lenmang sadema lapoktsütsü nüngdakba indang ashidang, ” iba osep ya alema maotsü ta masü saka iba ya tetuyur ka südaktsür, english dictionary-tem ama küm ana asem shia tajungba küma melenshitsü, enoksemtsü aser tangar oshia apua bener arua asen oshi küma amshitsü bilema inyaktsüla,” ta Wb,Temjen Toy-isa metetdaktsü.
Iba kasa sentong nung jembidang, Ao Senden tir Wb.Chubawati Longchar-i iba osep adokertem nem tenüngsang agütsü aser ano timi metongshipa aser ajungshitepa tajungba adoka aotsü ayongzük.
Kasa sentong nung Watsü Mungdang tir Wt.Maonginlaia jembidang, “ibai Aor oshi nung nüchiso anguba anogo lir,” ta ashi. Joko asen oshi ya mebenjatepi tajungba benteta aser rateta aotsü kanga nüngdak kümogo ta laisa shisem.
ABAM nungia Literature & Education Secretary, Wb.Apok Jamiri osep adoker nem tenüngsang agüja jembidang, oshi yabo jurila meyong masü saka nübor meyong, anungji iba tangatetba nung nisung ajaki oshioben renlokba nung shilem agitsüla ta ayongzük.
Kasa sentong nung Ao Senso Telongjem Dimapur tir Wb.L.Wati Jamir-ia jembidang, ibai Ao kini mamadoktsüba takok anogo ka lir ta Osep adoker nem tenüngsang agüja metetdaktsü. Ano, tarutsü nung lanurtemi ojang tasen aika enoksema aotsü imlar ta paisa ashi.
Iba sentong nung ASLB mapa nungiter tongti nisung Wb.Jemti Molleir-i jembidang, pei tetsü oshi ya senso shiai jembitettsüla, zülutettsüla aser züngtettsüla, tang amaisa ora asen oshi ya yakta samatsü ta tayongzükba ka agütsü.
” Ao oshi mesamadaktsüi renloka aotsü atema Ao oshireju ka lapoktsüla aser kaketshirtem rongnung Ao oshi nung mark junga angur nem sempet agüja ajungshitsüla,” ta paisa metetdaktsü.
Tanü iba sentong tenzüka Wb.Chubatemsü Jamiri sarasadem aser ASLB mendenbuba Dr.L.Temjen Jamir aser Arok osep yimotir Rev.C.Walu Walling, ASLB Arok Osep Lokmedem nung züngsem Wb.Anungba Sanglir aser ASLB nung tezülur Wb.I.Temjen Tzüdir nungertemi Arok osep zülua aruba indang aser teyaritepertem ajak dang pelaba metetdaktsü.
Iba osep meshiteta Dimapur Ao Baptist Arogo nung sannüker Rev.I.Watii sarasadem aser Kr.Mendinaro Longchari Ao oshi nung ken tajung ka tena liasü.