Ao Sendeni Naga nungertem dang len sayutsüla : T.R.Zeliang

Mokokchung Oct 1 (TYO) : Tang ama Naga yimten tebilemtsü ken o tatembang küma telatetba kati arutsü merangba mapang, Naga kintem rongnung Ao Senden ama longjema aliba teloki Naga nungertem dang tejakleni aotsüba len sayutettsüla ta Nagaland chief minister, Wb.T.R.Zeliangi metetdaktsü.
Tang ama India sorkar o NSCN-IM na tsüngda yimjung nung alitsü ken o renemba den ano ato kilonser Narendra Modii Naga yimten tebilemtsü ya latettsü asoshi temulungletba tulu alinungji, tang ama mapang tajung ya alangzüka Naga nunger ajak asoshi telatetba tajung ka bener arutsü yongyar ta paisa ashi.
Tanü Brehostibar nikongdang, Mokokchung nung Ao Senden ketdangpurtem den sensaksemdang, ” ibai kati ka aitsütepa jembiba mapang masü, saka Naga yimten telatetba kati arutettsüsa tebilemba aser shisatsü tajung agüja yaritepba mapang lir ta Chief ministerisa ashi.
Pa ya asüng Hokolbar nü Chuchuyimlang nungMahatma Gandhi Academy of Human Development reju ka semzükba sentong nung adentsü asoshi aluba mapang Mokokchung anenzüker Aor lenirtem den ajururba liasü.
” Ibai Naga nunger asoshi pei mulung lapoka Naga nunger tarutsü yimten jenjang koma süner, iba indangji shisalemsatepa jembiba mapang lir. Telatetba ka laletba sülenbo aija jembiyonga menur asütsü, anungji tang ama telemtetba magidang, Naga nungertemi telemtetba kechi komaka aginer, aji ashitsüla. Tang ya telemtetba kati marutet nungbo, ano telong pur telok teimbaang küma aotsüa akok,” ta CM-is ametetdaktsü.
” Ao Senden ya Naga nunger kintem rongnung telongjemba aser tashitemetetba kin asünungji, tang ama mapang ya yimten ken o süoktepa jembir, Naga nunger aotsüba lenmang sayutettsüla,” ta T.R.Zeliangisa metetdaktsü.
Chief ministerisa Rani Gaidinliu taküm indang ashidang, “sorkari la nem aküm agüja Memorial Library cum Museum, Kohima, yangluba ya laji linük nüjiso asoshi rarar ka liasü nungji la nem aküm agüja yanglur saka tamangba yimsü balaka sayur masü ta metetdaktsü.
Nie mesüra asenoki o tapu aika jembiaka, Rani Giadinlie-i British nunger anema inyakba asoshi la nem aküm agütsür , kechiyong asenoki tatalokba otsübo memelenshitettsü ta T.R.Zeliangisa metetdaktsü.
Rani Giadinliu-i India nüjiso atema British yimli anema raraba asoshi British nungertemi küm 14 puoka ayu aser India nüjiso anguba sülen dang chiok. Iba sülenjia 1950s nung telongi ai saka 1966 küm SC Dev-i mesüzüka temai adokdaktsü. Iba sülen Nagaland sorkari la nem cabinet minister jenjang nung senotsü teyari agüja aruogo. Item ama otsü tejangji metetter külenang Ao Senden telok amaibo jembitsüla ta Chief minister-isa metetdaktsü.
Tanü Ao Senden tenüng nung tir Wb.Imolembai anir ajuruba mapang, parnoki Chief minister dang tekaratiba nung Tuli Paper mill lapoktsüsa inyakdaktsütsüla aser tang Imkongliba Memorial Hospital, Mokokchung nung yipten 120 aliba ya yipten 220 aliba jenjang kümdakja ulushidaktsüner ta metetdaktsü.