Ao Sendeni T.R.Zeliangi jembiba aitsür

Dimapur, Jan. 31 (TYO) : Nagaland chief minister, T.R.Zeliangi yakanü Kohima nung osangbenertem den jembidang Naga nunger sobaliba nung nisung kati aibelenba atema küm 30 aridokba otsübo mangashidang ta jembibaji Aor kanga sashia aitsür ta Ao Sendeni metetdaktsüogo.
Nagaland nung nübortem madak yimsüsür kati Nagaland nung aliba Naga kin shia sobaliba indang meteta alitsüla, anungji chief minister kati Naga kin ka sobaliba memetetra, paji nübortem madak lenir asütsü metemsü ta Ao Sendenisa metetdaktsü.
Nagaland state yabo tanga state ama masü saka linük temzüng arla 371 A ajanga temeten balaka agüja lir, ajisüaka tang mangatettep aliba onük nung ya Nagaland tatar senden nung Naga kintemi aginüba onüktem kodanga benoka mejembi aser tang chief minister-i naga kin sobaliba indang jembitsüji menüngdaker, ibaji pasasa pa teka aronger asütsü ta Ao Sendenisa metetdaktsü.
Naga nunger kin shia sobaliba balala lir aser Ao kin temeten aser mapa nung shingaia benjatsütsü makok. Aor yimten sobaliba nung putu kaji küm 30 lir aser shibai aibelendir paji sobaliba temzüng ozüngi melaba ama aridoker ta Ao Sendenisa metetdaktsü.