Ao Temulung Süngratsülar Telungjem Mkg Town tenzüker küm 50 rentetogo

Kaket sayatsü mejateta jaoker Wt. Rowainlai ATSTMT jubilee nüngtem adokba kaket ka sayatsüdang tangokba noksa nung angur. Mokokchung, September 10, 2019.

Mokokchung, Sept 10 (TYO): Ao Temulung Süngratsülar Telungjem Mokokchung Town (ATSTMT) tenzüker küm tenem ajungba hon jubilee sentong “temeim nungi adokba tenüngsang” omen dak rangloker yangi Mokokchung town hall nung ayongzüka mungogo.
Tanü iba sentong nung Tsüngrem o jembir IEF tir, Wb. T. Chujang Aieri omen nung ajemdaker jembidang, Laishiba nung tanela süngjang rongnung tongtibangtiba aser mezüngbubaji temeim ya lir aser temeim medeni tanga süngjangtemji teperi makümer, ta ashi. Christian pur dak temeim sobutsü alitsübaji kanga tongtibang aser temeim agi dang alima koktettsü, ta paisa shisem.
Temeim alinung dang tanga süngjangtemji atangtsü. Temeim lira tepela angutsü, temeim ajanga taremzük adokdaktsür, temeim ajanga kümli tajung aser tejungnü aser tenüngsang agütsüba adokdaktsür, ta paisa ashi.
Tenüngsang agütsütsübaji kanga tongtibang aser Tsüngremi mulungba maparen ka lir, tenüngsang agütsüba nung takoksa kecha mali, kadi ka taoba ta tushiteptsübaji jangratemtsü, aji oda, alima nung arishi tatsüka alidang tenüngsang agütsütepa alitsü asoshi paisa tayongzükba agütsü.
Mejateta jaoker Jt. Director (Retd) Wt. Rowainlai ATSTMT jubilee nüngtem adokba nüngo kaket ka sayatsüba den külemi mapang tatsüka agia jembidang, küm 50 tashi arudang takok angubatem asoshi Tsüngrem nem tenüngsang agütsüba den tamakoktem asoshi tatok meshia tarutsü nükla tasen yur apusotsü ayongzük.
Tanü iba sentong nung Süngratsü Senso Senden Mokokchung Town tir Wb. Watizülu, Ao Temulunglar Telungjem Mokokchung Town tir Wt. Longerinla Lemtur, Mokokchung District Cultural Officer Wt. Rothaline Imchen, Bhutan Missionary Wb. Zülu Walling, Süngratsü Village Council Chairman Wb. M. Taka Longchar, parnoki salem o den tajungshi aser tayongzükba o tulu bener arua jubilee mungertem den lemsatep.
Sentong nung ATSTMT tir Wt. Moachilai tarur ajak pelaa agizük aser Jubilee planning committee convener Wb. Lemasashii melepzüng o jembia liasü. Jubilee Choir aser Kr. Temjensünglai ken ajanga tesentepertem saksalemdaktsü. Home Evangelist Wb. Chujang den temoatsü meshia sarasademer sentong tenzük aser Süngratsü Fellowship In-charge Mokokchung Town Wb. Sama Walling den tenüngsang agüja sarasademer sentong shibang.