Ao tesayur 20 shimtsüba nungi 5 dang shimba kuli meshir

Dimapur, Dec. 15 (TYO) : RMSA ajanga tesayurtem shimtetba maparen nung Ao subject sayutsü asoshi tesayur 20 shimtsü melen pongo dang shimbaji tesüngmangtsüka lir, anungji iba kuliji tanü iba osang adokba anogo nungi zünga anogo 30 tsüngda nung agütsütsüla ta Ao Senso Telongem, Dimapur-i metetdaktsüogo.
Yaküm 2014 küm January 27 nü RMSA nung State Mission Director-i secondary school nung Ao subject sayutsü asoshi tesayur 20 shimtsü atema osangkaket ajanga osang sangdonga liasü aser ibaji atema May 24, 2014 nü tezüluba nung tatidang agia liasü. Iba tatidang nung nisung 26-i takok angu. Iba sülen parnok 26-ji tebang agi asüngdangba tatidang agitsü asoshi August 11, 2015 nü aja aser tatidangji agir osangkaket ajanga November 30, 2015 nü result agütsü. Ajisüaka, iba result osang nungji Ao tesayur 20 shimtsü atema tezüluba tatidang nung nisung 26 shimteta aliba nungi nisung pongo dang shimtetba osang metetdakja liasü, iba jagi onoki kanga süngmanga bilemer ta Ao Senso Telongjem Dimapur (ASTD)-isa metetdaktsü.
Naga nunger oshi ka sayutsü asoshi RMSA ajanga tesayur 20 shimtsü lemzüktsüba nungi 5 dang shim süra ibajibo tatem tashi bushisüngdanga aotsü nüngdaktsü ta ASTD-isa metetdaktsü.
Iba osang ya osangkaket nung adoker anogo 30 tsüngda telangzüba temulung süa mengura ASTD-i tapet mapa ka inyaktsü aser ibaji atema sorkar khuret asütsü ta parnokisa metetdaktsü.