Ao Theological Association ajanga sarasadem ayonger

Anogo 14th June 2020 mapang 5:00 Am – 7:00 Am

Tayongzükba aser Sarasadem

Tanü alima tia ya kanga jangratemtsüka masü; nübur ajak shisa ramar len mongu-i nemzür amai, kechiaser Covid19 ajanga alima tebilemba ajak amajok aser teimla maka ama kümdaktsüogo. Nübur tejenoktsü ajak agi aseni amangba Tsüngrem-ji dang lir. Iba ama mapang ka nung Laishirtem tajaba jenjang khen reprangshitsü tim. Mosa, Yihusua, Dawid, aser Daniel ama Nübur anitsü Tsüngremi meteta shimtetba laishir ka-ka ta angateta nungloktsüba mapa inyaktsü mapang lir. Tanü ama tensa nung Laishir ola kechi aser koma asütsü/inyaktsü nüngdakü Atangji nung teyanglur aser taneptsür Tsüngrem ka lir ta kuli nübur ajak nem züngpong metetdaktsütsü Laishir sarasadem aser tanelar mapa südi.

*   Laishir shia Tsüngremer tajaba ka-ka lia shimtet. Anungji Tsüngremi nüngloktsüba ama aseni aniba santem den tamang tongpang jangja nokdaktsü mapang.

*   Kodak aser tamang (Faith) indang taküm piyong sayua aruba tasütsü wara arudang laishir-i kechi ashir. Tsüngrem O alima nung tenük agi ngua atangji atalokdang; nüburtem dang chichia tamang agi litetta sayur asü mesayurü

*   Meimchir alishi teimla ajak samadang, Daniel aser medemer den Tsüngrem nokdaka angu ama; asen laishir den tanela nung Tsüngrem adenba kuli sayutsü mapangji tang lir.

*   Nehemia nem mangdang agütsüba ama Laishir-i asen lima asoshi mangdang tasen meshidi.

*   Samson-i Tsüngremer sentong matalokdaktsüba ama alima lenir aser laishirtemi-a ashiko Tsüngremer mangdang lenmang aisü nung tamakok aludaktsür alitsü akok. Anungji, item tamakok-tem asoshi tatok meshia Laishir-i asen lima asoshi teti Tsüngrem dang shidi.

Sarasadem onük

1. Tsüngrem dang Tatok meshiba (II Putipuyang 7: 14)
2. Laishiri Tsüngrem mulung machitsüsa inyaka lira tatok meshidi.
3. Tenzüktsü asoshi aja-sür-nung kari danga atsüayonga aser anüalema tenzüka lira; tatok meshidi.
4. Laishiri anir Tsüngrem mulungba masü alishi aginüba nung dang tenzüka lira, tatok meshidi.
5. Tenüngsang agütsüba sarasadem (Tenüngsang ken 90:1-4)
6. Covid-19 den tongpang rara tulu raraba nung Tsüngremi tang tashi Naga nunger yakpang nung tenzükertem, lokti telen balala aser Arogo ajak len-aniba asoshi tenüngsang agütsüdi.
7. Tamanger ajak külemi mekülemtet-aka kija aser kibong nung Tsüngrem külemba-jia Tsüngremi mulungba ta asenok ajak nem tangtetba agütsüba asoshi tenüngsang agütsüdi.
8. Ao-er loktiliba, Yimten, Arogo aser kija-kibong ajaki sorkar den amalitepa timtemer aser nüngdakba-purtem yaritettsüsa Tsüngremi lenmang lapoktsüba asoshi tenüngsang agütsüdi.
9. Iba lockdown ajanga asen Naga nunger asoshi tanü tashibo chiyungtsü metokmeperi mesüi Tsüngremi moatsüba asoshi tenüngsang agütsüdi.
10. Tsüngrem tekümzükba Meshidi (T. Ken 121:1-8)
11. Amangbapurtem asoshi iba wara-ya tongpang raraba mapang ka lir. Iba ajanga Tsüngremer sobutsü sobur tanela terenemshiba nung nokdaktsü sarasademdi.
12. Iba wara-ya ajanga alima kin ajaki Abraham Tsüngrem, Isaac Tsüngrem, Yakob Tsüngremji dang teyanglur aser tekümzüksang Tsüngrem ta angatetdakjang ta sarasademdi.
13. Tang covid-19 wara dak sendakba nung ajemdaker tajungba onüktem benoka agiang.
14. Tsüngrem taochi meshidi (Mathi 35: 35- 45)
15. Tangar linük balala asoshi sarasademdi (Yob 42:10-17)
16. Wara sülen asen tamang akanga alitsü asoshi (I Peter 5:7-11)

Tsüngremi Laishir, tamangertem, aser nüburtem ajak Covid-19 Wara nungi kümzüka yujangma-ta asen tamang sarasadem südi. Külem Tenzüker;

                                                                               Sd/-
                                                                               (T Lima Longkümer)
                                                                               ATA: Tir.

                                                                               ( Chubatemjen )
                                                                               Senyur & Correspondence Secy.

Temetettsü

*    Iba Sarasadem Lim Arogo nung Pastor aser Laishir telongjem ketdangpurtemi ayonga agitsü mepishir.
*    Lai puti Shisa-liok nung tesayuri/seniori ayonga agitsü mepishir.
*    Sarasadem onük temji pei-pei sasep nung inoksema agiangma.
*    Covid-19 Protocol meraksai agitsü metetdaktsür.