Ao tsür Temsula-i Big B’er TV show nung shilem agitsü

Dimapur, Dec. 02 (TYO): Naga-Ao tsür, Temsutula Imsong-i Amitabh Bachchan-i ketdangsüba TV show ka nung shilem agitsü.
Temsula-i Prabhu Ghat merüktettsü atema kanga meranga inyakba atema Ato kilonser, Narendra Modi-ia la nem tenüngsang agütsüogo.
Lokti nung temelenshi bener arutsüba aser tangar ajungmesotsüsa inyaktetba atema lai Bollywood megastar Amitabh Bachchan-i hopta shia ketdangsüba show nung shilem agitsü maongka ngua shilem agiogo.
Star Plus nung yokba ‘Aaj Ki Raat Hai Zindagi’ nung iba episode ji December 6, 2015 (Deobar) nü telecast asütsü imlar.
Bodhbar nü osangbenertem den jembidang Temsula-i, “Iba show indang omen, koba ajanga lokti nung inyaktetba atema tongmelang nisungtem indang sayar, ibaji tenüng asangtsü tetemsü. Taküm October tom len iba show züngsemtemi ozü telok ‘Mission Parijat’ (tamalen Mission Prabhu ghat ta jaa liasü) ajuruba mapang onok kanga pelaa liasü. Iba show atema yimti nung anogo ananü tangok aser onoki ayimjema inyakba tesemtem ajak- Chet Singh ghat, Prabhu ghat, Babua Pandey ghat, Sonebhadra Kund ajak nung tangokogo,” ta ashi.
Taküm March ita nung Temsula-i Mission Prabhu Ghat tenzüka liasü, iba mission nung temelungertemi Ganga ayong nung aliba Prabhu Ghat merükteta liasü.
Parnok mapa atema Ato kilonser Narendra Modi-ia April mezüngnü social media ajanga tenüngsang agütsüogo.
Amitabh Bachchan den külemi shilem agitsü maongka anguba dak sentakba nung Temsula-i, “Ni iba ya pongmang ka amai tang tashi bilemer. Kü den külem züngsem Vishal Singh küna November 24 nü Mumbai-i oa Bollywood legend Amitabh Bachchan den episode tangokogo. Tamasabo ni kodamesüi liasü, ajisüaka ni sabangi atudang Amitabhi-i ni sadoksadoka kümdaktsü,” ta ashi.
Temsula den külemi social media ajanga inyaksemer Mumbai nungi Shishir Bajpai aser Kalpana Ravi natia Mumbai nung la meina liasü.
Temsula-isa, “Social media ajanga nüburtem, talisa lanurtem nungi telangzüba tajung aika nguogo, Varanasi temerükba aser India temerükba akumtsü atema yimti 30 dak tema onok den denogo,” ta ashi.