Ao Wikipedia Yanglutsü Apusor, Ajaki Mulungsua Shilem Agitsü Mepishir

– K. Temjen Jamir, Yimozülur, Tir Yimyim.

Ao Wikipedia Nükjidong –

Onoki nükjidong tongtibang ana yur iba Ao Wikipedia ya tenzüker.

Mezüngbuba nung, iba digital putu nung Ao oshi mesamadaktsüi wazüka jembitsü asoshi aser tanabubaji, tenokdangba kecha makai sademsadema nisung ajaki Ao oshi angazüktettsüsa sabang ka lapoktsütsü asoshi. Atangji, internet amshir kati 2007 küm Ao Wikipedia yanglutsü tenzükdanger anenba reprangteter, aser iba sülenbo taoba küm 19 tsüngda kecha renloka aoba mangur, anungji yangludar odang toktsü südi ta bilema alidang, University of Cambridge nung MPhil agir shisashir ka tenüng agi Tsüngrojungla Walling, Süngratsü, lai iba Ao Wikipedia ji yanglutsü tejangraba aser tebilemba Tir Yimyim dangi bener aruba pelashishia agizüka, kenlirbo  Internet nung Ao oshi agi temetetnüba ajak metettsüsa iba sentong ya tenzüker.

Süra  Ao Wikipedia ya kechi ?

Nübor ajaki angateta rajemtsü asoshi iba tetezü ya tetenzük nungi yamai lemsateper. English oshi nung adokba Encyclopedia  ya kaket tuluka lir aser iba kaket nung onük tapu aika bendena zülua lir. Ibai ocep amai masü, kechiyong ocep nungbo ojang shia tetezü ratettsür  saka  encyclopedia nungbo onük tapu balala indang züluba shitakba otsütem bendena yutsür, anungji encyclopedia yabo ocep danga taoba. Wikipedia ya senotsü tajangzük asoshi inyakba website ka masü, kechiyong yang nungi anguba temetettsütem ajak ya angati dang angutsü. Iba website nung yabo alima nung shitak atalokbatem indangang zülua angutsü.

Wikipedia ya koma amshir? Shirnoki item ocettem zülutsü ?

Ao Wikipedia nung aliba ocettem ya online nung iba website amshir  nisung mashi ka amshitettsü . Iba Ao Wikipedia atema ocet zülutsü asoshi na Wikipedia nung account alitsüla aser zülur külen enoka toktsütsü metettsüla. Iba inyakyim ya na email account lapokba den kasa lir.

Ibai nisung mashi kati angati  reprangtsü, zülu medemtsü (edit) aser lemsateptsü akok. Yangi enoktsüba ocettem ya shinga tsütsüa atsünga züluba masütsü.  Yangi aliba ocettem ya tulur aser tashitemetetertem kisüng dak nendaka melii nübortem nungi bendena temulungertemi zülutsü akok. Iba mapa nung ocet zülurtem aser medemshitsürtem ya külemi  telungjem nung kati ka akümtsübutepa aser temulung lemtepa külemi inyaktsüla.

Wikipedias Tangatetba :

Wikipedia-i amangerm alima nung aliba shisatsü ya ajak meyong lir. Internet nung aliba rongnung Wikipedia ya senotsü ajangzüktsü  tebilemba nung yangluba masüba rongnung ka lir, anungji meimchirtem dak temulung lema nübor ajak tajangzük angutsü tangatetba ka nung ibai yangluba lir. Iba nung ya shisatsütem ajak sadaka yutsüa alir aser iba amaji nisung mashi kati melenshitsüa akok aser ano nisung mashi ka tajangzük angutsüa akok.

Tanü asüng internet nung Wikipedia ya tesem kenyongi balaka aliba tesem ka lir, kechiyong yangibo meinprong kecha mali,  advertisements, algorithms aser bots mangur. Tezülurtem ya nisung dang aser parnoki ocet shiaji anepalur. Iba mapa ya ajanga alima ajaklen nungi nisungtem azünga alidang meimchirtemi meteta aliba temetetbatem angati  bendentsü, metongshitsü aser temetetbatem kümzüka yutettsü; tatsüba agi memetetba nisung ka yaria Ao oshi angazükdaktsütsü ta bilema inyaker. Aji oda, temetetba ya sen agi alitsü aser ayoktsü akokba oset ka amato masü saka alima ajunga nung miemchir temeten ama agizüker.

Tamajung inyakertem nungi Tekümzükdak  :

Nisung aikati Ao Wikipedia nung ya nisung ajaki angati zülutsü aser melenshitsü akok, anungji nisung kari tiyazü aser lendong aketba temetettsü kar enoka yutsü nunga shibai nokdangtsü ta bilema alitsü akok. Ajisüaka, Wikipedia nung ya meshitak aser tiyazü zülua toktsüba putettsüsa aser itemji melamelaa endoktsüsa yanglua lir. Iba website nung enoktsüba ocettem ya mesamai rezünga ayutsü atema ‘Saved’ sa ayur, anungji tangar kari tapak ka danga raksatsüra mesüra melenshira, idangjisa shitakbaji enoktettsü. Temelenshiba ajak nübortemi metettsüsa adoker  aser tapak kar melenshira yimozülurtemi tapakji melamelaa melentsütettsü.

Tangari menüngdakba ocettem angutsüa akok saka parnoki Ao mezüngtettsü, anungji nisung kari Ao nung meshitak aser tim masüba ocet kar zülura, Ao jembirtemi dang reprangtettsü. Ibayongji, yangi bendanga agüja inyaker yimozülurtem alitsü aser item rongnung ano ketdangser ka alitsü nüngdaker, item jagi mapang shia temelenshibatem ali-mali reprangtsü. Tongtibangsa, iba Ao Wikipedia ya shitak kümzüka ayutsü atema Aotsür Aor ajaki teti mita repranga atatsüla.

Kechiba Ao Wikipedia alitsü nüngdaker ?

Lanurtem Ao oshi jembiba nungi pilaba aser Ao oshi tesamatsü lendong  jenjang ka nung lir.

Tang ya, talisa Mokokchung district nung alir Aor nütsüng lakh 2.3 shi lir aser alima nung samatsü akokba oshitem rongnung Ao oshi ya ka lir ta ‘Atlas of the World’s Languages in Danger’ ajanga reprangteta lir. Tetezüji tanurtem aikati jembir saka  kidang amala nung jembiba dak alaka tanga tesem nung bulua jembitsü mangoka mengui akümer.

Teshisadanger kati bushitetbaji, ( A Sociolinguistic Case Study on Ao Students in Shillong – Temsünungsang, 2022) Ao kaketshirtemi pei medemertem den jembidang Ao agi jembirtemji 37 % dang liasü ta bushitet. Asen lima ama kin aika meyoktepa alidak oshi tapu aika jembidak aser inyakyim digitalize süa akümba ajanga, joko aikati English aser Nagamese dang sapua jembir.

Tanü asüng atura tsüraburtemi aikati , talisa digital media sapua amshitepba agi English dang jembir, anungji kidang kibong nung Ao jembiba sobaliba raksadagi. Iba ya mereprangtet odang toktsüra, taruba küm ishika tsüngda nungbo Ao oshi junga jembiteter mali kümadoktsü.

Iba Digital putu nung oshi ka mesamai taküm lia renlokdaktsütsü asoshi digital inyakyim nung aotsüla.

Aji oda, tanübo internet nung manguba aser mamshiba oshibo menua melii samatsü, kechiyong lanurtemi temetetnüba aser  angazüknüba angazüktsü atema  internet dang amshir aser idangji aikati sapua amshia aliba oshi English ama dangi dang meyiptsü.

Wikipedia tapak yagi oshi ajanga oshi ya taküm lidaktsütettsü aser tanü putu den peta süiren nungi science tashi onük ajak lemsateptettsü ta jangjatsür.

Asenoki metettsüba kaji, tesamar aliba oshitem aika züluren memedemtsü aser tanü putu den peta ojang aika mamshitettsü. Iba ama mapang, encyclopedia ajanga oshi junga jembir aser oshi nung mongintemi ojang tasen purapitettsü aser oshi wazüka ayutsü ajungshir, aji mesüra taintem den külemi oshiji samadoktsü.

Lanurtem nem Milen melenoktsüba :

Kodang taintemi aser oshi nung mongintemi oshi nung orülem (grammar) benteta toktsüdir, lanurtemi digital dak sendakba shisatsü ajanga parnok nüngdak mapa inyak dang oshiji amshitsü aser tanü putu den apet oshiji maparen ajak nung renloka aotsü.

 Aji oda, pei oshi nung aliba Wikipedia ya kaketreju aser kaketshirtem asoshi shisaliok nung nüngdakba tagitarutsü angati reprangtettsü.

Iba ama Wikipedia aliba ajanga tangar bendanger dak nendaka melii, pei oshi agi pei otsü aser tebang agiang jembia aruba sobalibaren aser pei tangatetba bendena yutettsü.

Tebushitetba ka (Case study) : Seediq Wikipedia, Taiwan

Taiwan lima alirtemi jembiba Seediq oshi ya parnok nisung meyirijang metsü (20,000) shi agi jembir aser UNESCO-i iba oshi ya tesamaleni odagi ta reprangteta lir. Anungji, Taiwan Ministry of Education; the Center for Aboriginal Languages, Cultures and Education (ALCD), National Chengchi University, aser parnok sensosangertem lungjemer küm 6 agia Wikipedia yanglu tenzük aser 2021 küm parnoki parnok meyong oshi nung Wikipedia yanglua tenzüktet.

Ao Wikipedia yanglua alitsüba sentong koma asütsü ?

Iba Wikipedia nung Ao oshisa süaka Chungli oshi nung zülutsü. Ajisüaka, oshi mesamatsü atema  Mongsen oshi jembirtem nungia Mongsen nung ocet zülua shilem agira onoki pelashishia agizüktsü.

Melepzüng O :

Onok, iba Wikipedia achaayangertemi  Ao oshi ya mesamadaktsüi wazüka renlokdakltsütsü nüngdak ta reprangteter, kechiyong pei tetsü oshi ya kin ka asoshi ayak, anungji kanga akümtsübua inyaktsübaji tongtibang ta angateta lir.

Tanü putu nung lanurtemi pei tetsü oshi sentoka yutsüba mapang, iba ama lanurtemi digital nung amshitettsüsa Wikipedia yanglua toktsütsübaji tongtibanga ta bilemer. Iba Ao Wikipedia  ajanga Ao lanurtem asoshi pei tsürabur aser taintem den digital lima nung ajurutepa pei oshi nung otsüolem aser tebilembatem jangratema lemsateptettsü ta onoki amanger.

Tatishitsü agi, video game jangrar lanur kati kenübo Ao oshi nung mezüngbuba Video game indangji ocet zülutsüa akok. Iba ama ocet tila ka zülua Ao Wikipedia nung enoktsü tenzükba nungi meilongi oshi mesamadaktsüi taküm kümdakja renloka ao tenzüktsü.

Ao limai Khristan yimsü aruba mapang nung Ao oshi Roman zülujang nung zülua tenzükba nungi Ao Laishiba adoktetba aser Ao ojang aika tasen purapiteta amshia aruba mapatem aser talisa, tanübo Ao Rijui lenisüba tajung agüja kaketrejutem temaba jenjang nunga sapua azüngtsüsa inyaktetba takok mapatem yagi Ao oshi ya tajungba küma renloka aotsü koka lir ta kuli angur.

Iba amaji zülujang angazükba nungi kaket küma adoka azüngba Ao kaket keno terenlok mapatem nungi tanü putu den peta Ao oshia Wikipedia ajanga digital lima nung ajemokba ya Ao oshi renlokba mapa nung mera tasen ka asütsü.

Iba Ao Wikipedia sentong ya takok ngua inyaktettsü atema Aotsür Aortem rongnung tezülutetertemibo menungnangi peii metetba otsü aser onüktem zülur Ao Wikipedia yanglurtem dangi email-aiwikipedia@gmail.com ajanga yoktsü mepishir.